Pjesëmarrja në zgjedhje është sa e drejtë edhe përgjegjësi. Një shoqëri që kërkon progres dhe standarde të larta qeverisjeje, jetese dhe përfaqësimi është edhe një shoqëri që ka nevojë jetike për kontribut e pjesëmarrje sa më të lartë e cilësore të qytetarëve, ka nevojë për debat politik qytetar, ka nevojë për transparencë dhe llogaridhënie.
❔ Cilat janë pritshmëritë rinore ndaj procesit zgjedhor 2025?
❔ Cilat janë mësimet e tranzicionit dhe perceptimi publik i nxjerrë nga sondazhet?
❔ Cilët janë mekanizmat qytetar për të ushtruar sovranitet dhe jetësuar demokracinë funksionale?
❔ Cilat janë motivet që i bëjnë zgjidhjet institucionin më të rëndësishëm në vendimmarrje?
❔ Cilat janë nevojat dhe kërkesat e brezit më të ri dhe sa përputhen ato me programet dhe ofertat e partive politike?
❔ Sa njihet sistemi i ri zgjedhor dhe si do të zgjidhen deputetët?
❔ Sa informohen të rinjtë mbi politikën dhe cilat janë mekanizmat e formimit politik?
Këto e të tjera tematika të ndërlidhura ishin pjesë e forumit të diskutimit me të rinj nga bashkia Lushnje. Forumi mblodhi së bashku të rinj, aktivistë lokalë, përfaqësues nga këshilli bashkiak dhe deputetët e Kuvendit, Lindita Buxheli (PS) dhe Saimir Korreshi (PD). Tryeza u përshëndet nga ambasadori i Mbretërisë së Vendeve të Ulta Reinout Vos, i cili u ndal në rëndësinë e votës dhe standardeve demokratike si sfidë në kuadër të procesit të përafrimit me Bashkimin Europian. Ekspertët Erjon Tase (ASP) dhe Afrim Krasniqi (ISP), këshilltarët vendorë Ervin Sina (PS) dhe Klement Çela (PD) si dhe disa të rinj pjesëmarrës kontribuuan në debatin e moderuar nga Arjola Korreshi.
Aktiviteti u realizua nga Instituti i Studimeve Politike (ISP) në bashkëpunim me Akademia e Studimeve Politike (ASP), si pjesë e projektit “Partneritete të forta për reforma të qëndrueshme – Forcimi i rolit të shoqërisë civile në adresimin e sfidave të zgjedhjeve të lira dhe të drejta”, mbështetur nga Ambasada e Mbretërisë së Vendeve të Ulta përmes programit MATRA. Aktivitete të njëjta janë mbajtur më parë në Korçë, Fier, Tiranë, etj.
