Ne, organizatat e shoqërisë civile, mediat e pavarura dhe mbrojtësit e të drejtave të njeriut nënshkruese të kësaj deklarate, shprehim shqetësimin tonë për përsëritjen e fushatave të denigrimit dhe të sulmeve publike ndaj gazetarëve, aktivistëve, organizatave të shoqërisë civile dhe qytetarëve që ushtrojnë të drejtën e tyre për t’u shprehur, për të protestuar apo për të marrë pjesë në debatin publik.
Nuk bëhet fjalë për raste të izoluara apo për mosmarrëveshje mes individësh. Bëhet fjalë për një model komunikimi që po shfaqet gjithnjë e më shpesh dhe që synon ta zhvendosë debatin nga çështjet me interes publik te sulmet ndaj individëve që i ngrenë ato.
Në vend të debatit mbi argumentet, vihen në shënjestër personat. Në vend të diskutimit mbi faktet, vihen në dyshim motivet. Në vend të transparencës dhe llogaridhënies, përdoren insinuata, etiketime dhe narrativa që synojnë të diskreditojnë punën profesionale dhe angazhimin qytetar. Këto praktika nuk prekin vetëm individët e përfshirë; ato krijojnë një klimë presioni që dekurajon pjesëmarrjen në jetën publike dhe ngushton hapësirën qytetare.
Në javët e fundit, këto sulme kanë prekur organizata, gazetarë, aktivistë, mbrojtës të mjedisit dhe qytetarë të ndryshëm. Megjithëse objektivat ndryshojnë, modeli mbetet i njëjtë: përmes sulmeve personale, etiketimeve dhe narrativave denigruese synohet të shmanget debati mbi çështjet e ngritura dhe të ushtrohet presion ndaj kujtdo që zgjedh të marrë pjesë në jetën publike.
Ky model bëhet edhe më shqetësues kur përforcohet nga persona që ushtrojnë funksione publike. Në një shoqëri demokratike, zyrtarët publikë kanë jo vetëm të drejtën, por edhe përgjegjësinë për të marrë pjesë në debatin publik, duke respektuar standardet më të larta të komunikimit institucional. Përdorimi i autoritetit publik për të veçuar me emër aktivistë, gazetarë apo qytetarë dhe për t’i ekspozuar ata ndaj fushatave të denigrimit nuk është në përputhje me standardet demokratike që Shqipëria është zotuar të respektojë.
Lutemi, deklaratën e plotë e gjeni bashkëlidhur këtij emaili, ose për lehtësi mund ta aksesoni në linqet e mëposhtme:
English: Public-statement-in-defence-of-civic-space-freedom-of-expression-and-democratic-debate
