Në kuadër të projektit ‘’Unë marr pjesë, zëri im, vota ime vlen!’’ të mbështetur financiarisht nga Bashkimi Evropian, të cilin Instituti i Studimeve Politike (ISP) po e zbaton në bashkëpunim me Komitetin Shqiptar të Helsinkit (KSHH) dhe Civil Rights Defenders (CRD), shpallim konkursin me ese për tematikën “Pikëpamja e të rinjve mbi partitë politike dhe rolin e tyre në promovimin e demokracisë në vend”.
Konkursi i esesë synon të nxisë të rinjtë të shprehin pikëpamjet e tyre lidhur me rolin e partive politike në Shqipëri duke ju përgjigjur pyetjes: A janë partitë politike promovuese apo penguese të vlerave demokratike, thellimit dhe konsolidimit të parimeve të saj brenda dhe jashtë strukturave partiake? Ese-të duhet të jenë të mirëargumentuara, të tregojnë qartësi mendimi dhe të pasqyrojnë origjinalitet në mendim dhe qasje. Argumentat e shpalosur në ese duhet të bazohen në zhvillime apo raste konkrete.
Konkursi ka si synim promovimin, advokimin dhe motivimin e rinisë shqiptare që të reflektojë mbi rëndësinë e angazhimit me aktorë dhe procese politike, apo të shpalosë qasje dhe ide që nxisin përmirësimin e ofertës së partive politike, përmirësimin e demokracisë së brëndshme dhe rrisin nivelin e përfaqësimit.
Disa nga temat e sugjeruara ku mund të fokusohen ese-të përfshijnë:
- Funksionimi i demokracisë së brendshëm i partive politike
- Të jesh anëtar partie: përgjegjësitë, të drejtat dhe ndikimi në vendimmarrje
- Roli i anëtarësisë në zgjedhjen e drejtuesve të partisë dhe të kandidatëve
- Sistemi i meritokracisë dhe i promovimit të prurjeve të reja në partitë politike
- Niveli i përfaqësimit në partitë politike
- Roli i partive politike në jetën publike dhe vendimmarrjen politike
- Votuesit e rinj dhe ofertat politike, ndikime dhe raporte besimi/mosbesimi
- Partitë dhe llogaridhënia publike
Të gjitha punimet do të publikohen në platformat e Institutit të Studimeve Politike. Tre prej punimeve më të mira do të pëzgjidhen nga komiteti vlerësues dhe do të shoqërohen me honorar.
Punimet nuk duhet të jenë më shumë se 1200 fjalë. Afati për dorëzimin punimeve është data 25 qershor 2021 ndërsa fituesit do të shpallën me 2 korrik 2021. Për të dorëzuar punimin, na shkuani një email ku të bashkëlidhni punimin në formatin MS Word dhe me titullin e emailit: “Unë marr pjesë, zëri im, vota ime vlen!” – ESE” dhe dërgojeni te [email protected] ose/dhe [email protected]. Dërgimi i punimit shoqërohet me një foto dhe CV përshkruese 5 reshta për autorin/autoren. Të gjithë kontribuuesit do të njoftohen me anë të emailit që punimi i tyrë është dorëzuar me sukses.
Për çdo paqartësi lutem na shkruani!
