Instituti i Studimeve Politike (ISP) organizoi tryezën “Standardet dhe praktikat e procesit raportues në Kuvendin e RSH”, me fokus disa nga institucionet kryesore të drejtësisë: Prokuroria e Përgjithshme (PP), Inspektori i Lartë i Drejtësisë (ILD), dhe Avokati i Popullit (AP).
Aktiviteti u përshëndet nga drejtuesi i ISP Afrim Krasniqi dhe drejtore e zyrës së WFD në Shqipëri Valbona Kuko. Eksperti Viktor Gumi, paraqiti disa opinione lidhur me parimet dhe problematikat e jetësimit të mbikëqyrjes parlamentare, shoqëruar me rekomandime konkrete për përmirësim.
Në emër të Kuvendit, kryetarja e Komisionit për Çështjet Ligjore, Administratën Publike dhe të Drejtat e Njeriut Klotilda Bushka, si dhe disa nga këshilltarët e Shërbimit të Monitorimit të Institucioneve të Pavarura, shprehën pikëpamje konkrete, propozime dhe vlerësime, duke theksuar rëndësinë e një roli aktiv të parlamentit në procesin mbikëqyrës, si dhe gatishmërinë për të bashkëpunuar me organizatat e shoqërisë civile dhe aktorët e tjerë lidhur me këto problematika. Zonja Bushka vlerësoi edhe raportet e ISP, rekomandimet e ofruara dhe në mënyrë konstruktive sugjeroi masa e mekanizma konkrete për adresimin e tyre.
Në emër të institucioneve të pavarura shprehën opinionet e tyre mbi gjetjet e monitorimit të kryer nga ISP, Avokatja e Popullit Erinda Ballanca, drejtori i drejtorisë së koordinimit institucional në Prokurorinë e Përgjithshme Kostaq Beluri, si dhe Isida Koka, këshilltare në Kabinetin e Inspektorit të Lartë të Drejtësisë. Në debat kontribuuan edhe përfaqësues nga shoqëria civile, si Erjon Tase (ASP), etj.
Thelbi i debatit të moderuar nga eksperti Lutfi Dervishi lidhej me gjetjet aktuale të monitorimit të kryer nga ISP dhe standardet ligjore dhe ato të synuara lidhur me jetësimin e një procesi sa më transparent, gjithëpërfshirës, efektiv dhe llogaridhënës në korelacionin midis institucioneve të pavarura që paraqesin raporte vjetore në Kuvend dhe këtij të fundit.
Si ushtrohet procesi mbikëqyrës i parlamentit ndaj institucioneve të pavarura? Cilat janë gjetjet dhe problematikat kryesore lidhur me raportimet vjetore në Kuvend? Cili është roli i deputetëve dhe komisioneve në procesin e raportimeve? Cilat janë vlerësimet mbi procesin raportues të PP, AV dhe ILD? Cilat janë ndryshimet pozitive dhe gjetjet kritike të raportimeve 2024 në raport me vitin 2023? Sa respektohen standardet e transparencës dhe llogaridhënies në procesin raportues? Cili është bilanci i jetësimit të rekomandimet të parlamentit 2023? Cili është bilanci i jetësimit të kërkesave të vetë institucioneve ndaj parlamentit 2023? Cilat janë nevojat për përmirësime në aktet rregullatore të Kuvendit? Cilat janë rekomandimet kryesore për efikasitetin e procesin mbikëqyrës? Cilat janë problematikat lidhur me fushat e përgjegjësisë së institucioneve dhe problemet e bashkëpunimit/koordinimit institucional?
Këto e të tjera tematika ishin pjesë e tryezës së organizuar nga Instituti i Studimeve Politike në kundër të projektit “Rritja e llogaridhënies së qeverisë përmes një Parlamenti më reagues”, i cili po realizohet nga Fondacioni Westminster për Demokracinë (WFD) me mbështetjen financiare nga Ambasada Britanike në Tiranë.
ISP po monitoron procesin raportues, ushtrimin e funksionit mbikëqyrës dhe funksionin zgjedhor të parlamentit, si dhe sipas praktikave të mëparshme, gjetjet kryesore do të jenë publike në formën e raporteve adresuar deputetëve, Kuvendit, institucioneve të përfshira dhe rrjetit të shoqërisë civile.
