KQZ dhe organet ligjzbatuese do të dënojnë me forcën e ligjit çdo veprim që cenon zgjedhjet – ishte slogani dhe premtimi i KQZ përpara zgjedhjeve.
a) Institucioni i Prokurorisë ka njoftuar se ka regjistruar 53 raste për vepra penale në lidhje me zgjedhjet. SPAK gjithashtu ka disa raste të tjera në shqyrtim.
b) Gjatë procesit të ankimimeve janë konstatuar gjithashtu raste të ndryshme të abuzimit me detyrën nga komisionerë dhe numërues.
c) Në KQZ janë depozituar raportet e monitoruesve mbi fushatën zgjedhore 2021, të cilat përmbajnë edhe të dhëna kritike në përmbajtje, në informacion dhe në raportet me standardet ligjore të monitorimit.
d) Subjekte të ndryshme politike dhe media, shoqëria civile dhe raporte ndërkombëtare kanë evidentuar edhe raste të shkeljes së dispozitave të Kodit Zgjedhor nga komisionerë, numërues dhe pjesëtarë të tjerë të administrimit zgjedhor.
e) Partitë politike, koalicionet dhe kandidatët e pavarur duhet të depozitojnë raportet mbi financimin dhe shpenzimet elektorale dhe KQZ të bëjë verifikimin e saktësisë së tyre.
f) Mediat duhet të raportojnë financimet partiake përmes reklamave dhe formave të tjera, dhe KQZ duhet të kryejë verifikimin e të dhënave.
KQZ ka premtuar se çdo zyrtar zgjedhor që abuzon me ligjin duhet të mbajë përgjegjësi dhe të përgjigjet përpara drejtësisë.
g) KQZ duhet të analizojë të gjitha rastet e konstatuara dhe t’i japë fund traditës negative të pandëshkueshmërisë duke marrë masa ligjore dhe administrative ndaj cilido që ka abuzuar me ligjin dhe që rezulton se ka ndihmuar direkt në deformimin e rezultatit zgjedhor.
i) Një votë e vetme e deformuar në numërim apo një standard zgjedhor i deformuar në administrimin zgjedhor përbëjnë arsye të mjaftueshme për hetim dhe vendimmarrje nga KQZ.
j) KQZ duhet të sigurojë jetësimin e parimit të nenit 9 të Kushtetutës së RSH për transparencën e burimeve të financimit të partive politike, së paku në fushatën elektorale.
Qeverisja bazohet në një sistem zgjedhjesh të lira, të barabarta, të përgjithshme e periodike. Transparenca dhe llogaridhënia janë standarde të panegociushme të shtetit të së drejtës dhe demokracisë funksionale.
Instituti i Studimeve Politike (ISP) është duke monitoruar KQZ dhe fushatën elektorale, si pjesë të angazhimit në projektin “Monitoring the 2021 Parliamentary Elections in Albania” mbështetur financiarisht nga qeveria e Mbretërisë së Bashkuar përmes ambasadës britanike në Tiranë.
