Gjatë fushatës elektorale dhe pas zgjedhjeve subjekte elektorale dhe kandidatë për deputetë, media dhe grupe të ndryshme monitoruese kanë ngritur pretendime për shkelje të legjislacionit zgjedhor nga komisionerë, zyrtarë përgjegjës dhe grupet e numërimit të votave. Gjithashtu aktorë të ndryshëm kanë depozituar në KQZ kallëzime të shumta lidhur me raste të shkeljes së Kodit Zgjedhor.
Monitorimi i Institutit të Studimeve Politike tregon se KQZ ka pranuar çdo ankimim, por procesi i verifikimit të fakteve dhe i shqyrtimit administrativ deri në vendimmarrjen finale ligjore kërkon kohë, vullnet, staf profesional dhe bashkëpunim institucional. KQZ ka promovuar vazhdimisht premtimin se cilido që cenon votën do të përballet me drejtësinë. Rastet e ankimimeve dhe pretendimeve për cenimin e votës meritojnë të përballen me drejtësinë.
ISP beson se KQZ ka të gjithë informacionin dhe kapacitetet për të qenë më aktiv në përmbushjen e detyrimeve dhe premtimeve të tij për ndëshkimin e krimeve zgjedhore. Mbi këtë bazë, ISP apelon KQZ që pavarësisht përkatësisë politike të rasteve të denoncuara të ndërmarrë çdo hap ligjor për të vendosur përpara drejtësisë çdo komisioner, zyrtar apo numërues që ka cenuar votën.
Mbrojtja e integritetit të votës është përgjegjësi ligjore dhe kushtetuese, është nevojë dhe sfidë. KQZ dhe institucionet ligjzbatuese duhet ta garantojnë atë.
Instituti i Studimeve Politike (ISP) është duke monitoruar KQZ dhe fushatën elektorale, si pjesë të angazhimit në projektin “Monitoring the 2021 Parliamentary Elections in Albania” mbështetur financiarisht nga qeveria e Mbretërisë së Bashkuar përmes ambasadës britanike në Tiranë.
