Ligji 138/2015, i njohur si ligji i dekriminalizimit dhe Udhëzimi i KQZ nr.21 / 2020 për verifikimin e formularëve të vetëdeklarimit, ngarkon KQZ që të bëjë verifikimin e kandidatëve brenda 72 orëve të gjithë dokumentacionin e kandidatëve. Në rreth 1800-1900 kandidatë të paraqitur KQZ do të duhet të bëjë verifikimin e të dhënave formale (plotësimi i formularit të dekriminalizimit), si dhe të dhënave specifike (rastet e të dhënave penale që posedohen nga Prokuroria, Drejtoria e Përgjithshme e Burgjeve dhe organet e tjera të specializuara). Në të kaluarën të dy filtrat e verifikimeve kanë ofruar të dhëna kritike për kandidatë të ndryshëm për deputetë, duke sjellë heqjen e tyre nga lista, dorëheqjen personale apo humbjen e mandatit të deputetit.
Bazuar në praktikat e mëparshme edhe në këtë zgjedhje problemi thelbësor mbetet afati kohor është shumë i shkurtër për disa mijëra verifikime të kandidatëve, si dhe mungesa e një database të plotë informative mbi qytetarët me vepra penale në sistemin tonë të drejtësisë dhe në sistemet e drejtësisë të vendeve ku ka juridiksion shprehimisht edhe ligji i dekriminalizimit. KQZ nuk ka burime njerëzore dhe të dhëna të detajuara të mjaftueshme për jetësimin e të gjithë procesit në këtë afat, ndaj puna monitoruese e tij përqendrohet kryesisht në aspektin formal të formularëve të plotësuar.
Instituti i Studimeve Politike (ISP) vlerëson se zgjidhja më oportune do të kishte qenë që vetë partitë politike të mund të dërgonin listat e kandidatëve paraprakisht në Prokurori për verifikim, që Ministria e Drejtësisë të mund të vendosë në mënyrë funksionale në dispozicion të KQZ database të individëve të dënuar brenda e jashtë vendit, dhe që vetë KQZ të ishte asistuar me personel shtesë për verifikimin cilësor të të dhënave në afatin minimal kohor.
Instituti i Studimeve Politike (ISP) është duke monitoruar KQZ dhe fushatën elektorale, si pjesë të angazhimit në projektin “Monitoring the 2021 Parliamentary Elections in Albania” mbështetur financiarisht nga qeveria e Mbretërisë së Bashkuar përmes Ambasadës Britanike në Tiranë.
