Komisioni i Ankimimeve dhe Sanksioneve (KAS) është një prej tre organeve drejtuese të KQZ dhe një prej risive në legjislacionin e ri zgjedhor. Kompetenca e tij thelbësore është shqyrtimi i ankimimeve administrative dhe vendosja e sanksioneve për shkelje të ligjit zgjedhor.
Gjatë aktivitetit të deritanishëm vendimmarrja e KAS është bazuar më shumë në shqyrtimin e ankimeve administrative sesa në vendosjen e sanksioneve për shkelje të ligjit zgjedhor. Sipas monitorimit të Institutit të Studimeve Politike disa prej vendimeve të tij janë kritikuar gjerësisht nga shoqëria civile kryesisht për shkak të reflektimit në vendimmarrje të raporteve politike përbërëse të KAS, si dhe interpretimit të legjislacionit zgjedhor në mënyrë të diskutueshme.
KAS ka një rol thelbësor në shqyrtimin e ankimimeve lidhur me rezultatet paraprake të zgjedhjeve. Ai ka të drejtë të marrë provat në administrim të KQZ-së, si dhe të kërkojë hetime dhe informacion shtesë nga institucionet e përfshira në ankimimet zgjedhore. Vendimmarrjet e tij me 4 nga 5 vota kërkojnë konsensus të gjerë midis anëtarëve, si dhe kanë ndikim të rëndësishëm në vlerësimin e standardeve dhe të integritetit të procesit zgjedhor.
ISP vlerëson se KAS ka të gjithë bazën ligjore dhe kapacitetet mbështetëse për vendimmarrje cilësore, ndaj ISP apelon që aktiviteti i tij të jetë sa më transparent, profesional dhe i paanshëm.
Zgjedhjet janë baza e demokracisë përfaqësuese. Vota dhe respekti ndaj saj është detyrim ligjor dhe kushtetues.
Instituti i Studimeve Politike (ISP) është duke monitoruar KQZ dhe fushatën elektorale, si pjesë të angazhimit në projektin “Monitoring the 2021 Parliamentary Elections in Albania” mbështetur financiarisht nga qeveria e Mbretërisë së Bashkuar përmes ambasadës britanike në Tiranë.
