Në dhjetor 2015 parlamenti miratoi ligjin 138/2015 i njohur si ligji i dekriminalizimit. Qëllimi i tij ishte mbrojtja dhe garantimi i mirëfunksionimit demokratik të Kuvendit dhe institucioneve të tjera nga ndikimi apo pjesëmarrja në politikëbërje dhe/ose vendimmarrje i personave me rekorde kriminale dhe penale.
Ligji ka funksionuar, por ende ka individë, të cilët në kundërshtim me ligjin 138/2015 synojnë poste politike, ndikim politik apo angazhim në stafet elektorale dhe administrimin zgjedhor. Në prill 2021 do të zhvillohen zgjedhjet parlamentare. Ky është një test i rëndësishëm që partitë të dëshmojnë vullnet të qartë për jetësimin integral të dekriminalizimit. Partitë janë duke zhvilluar zgjedhjet e tyre të brendshme për stafet drejtuese dhe kandidatët. Partitë kanë premtuar të aplikojnë standarde etike dhe integriteti brenda tyre. ISP nxit partitë politike të bëjnë publike CV e ekipeve drejtuese, si dhe të gjithë kandidatëve për deputetë përpara afatit të regjistrimit në KQZ. Partitë mund t’i drejtohen Prokurorisë për të verifikuar paraprakisht stafet dhe kandidatët. Të dy këto mekanizma do tu mundësonin partive politike filtrimin e kandidatëve me rekorde negative përpara se të bëhen kandidatë zyrtarë.
Instituti i Studimeve Politike (ISP) me mbështetjen e NED është duke monitoruar zgjedhjet në partitë politike për kandidatët për deputetë dhe strukturat e tyre. Një database publike http://dekriminalizimi.isp.com.al/ është ngritur për këtë qëllim.
Dekriminalizimi i politikës nuk është vetëm procedurë, por frymë, vullnet dhe përgjegjësi.
Koha për politikanë dhe politikë të pastër!
Koha për integritet, transparencë e llogaridhënie në vendimmarrje!
