Një parlament i pastër dhe funksional është në interes të shtetit, shoqërisë, progresit dhe integrimit të vendit në BE. Aplikimi i standardeve mbi parandalimin e Konfliktit të Interesave në vendimmarrjen parlamentare përbëjnë një prej sfidave prioritare për Kuvendin. Kodi i Sjelljes në parlament kërkon që deputetët të udhëhiqen nga parimet e ligjshmërisë, ndershmërisë, objektivitetit, transparencës dhe përgjegjshmërisë, si dhe që ata të shmangin konfliktin e interesit me detyrën dhe të mos shfrytëzojnë pozitën për interesin e tyre personale.
Nga monitorimi i ISP për periudhën janar – prill 2019 rezulton se në tërësi, Kuvendi dhe deputetët kanë shënuar progres relativ në raport me rëndësinë që i jepet trajtimit të rasteve të të interesit dhe të aplikimit të standardeve më të larta të Kodit të Sjelljes. Megjithatë monitorimi tregon se nuk ka ende reflektim nga grupet parlamentare për më shumë rregulla e standarde etike brenda tyre, në mënyrë që deputetët dhe vendimmarrjet të krijojnë, jo vetëm një mekanizëm llogaridhënie të brendshme, por edhe ta stimulojnë llogaridhënien dhe transparencën në të gjithë larminë e aktivitetit të Kuvendit të Shqipërisë.
Ky spot informues dhe sensibilzues është pjesë e aktiviteteve të Institutit të Studimeve Politike në kuadër të projektit “Parlamenti i pastër: llogaridhënie dhe transparencë”. Projekti realizohet me mbështetjen e Programit të Shoqërisë Civile për Shqipërinë dhe Kosovën, financuar nga Ministria e Punëve të Jashtme të Norvegjisë dhe menaxhuar nga Fondacioni Kosovar për Shoqëri Civile (KCSF) në partneritet me Partnerët Shqipëri për Ndryshim dhe Zhvillim (PA).
