Reforma zgjedhore duhet të nisë nga thelbi i problemit: reformimi i partive politike dhe ri-bërja e ligjit të partive politike. Sistemi aktual i partive dhe aktiviteti i tyre është i mbyllur, jo demokratik, jo transparent, jo konkurrues dhe jo kushtetues. Partitë janë bartëset më të mëdha të pushtetit, por ato janë edhe burimet më të mëdha informale në vend. Sistemi konkurrues në Shqipëri është penalizues për kandidatët e pavarur, lëvizjet e reja, partitë e reja, dhe kësisoj është e kundërta e trendit që po ndodh në vendet perëndimore, ku prurjet e reja po sjellin ndryshime historike.
Partitë duhet të përjashtojnë publikisht nga radhët e veta individët e identifikuar si të inkriminuar, duke i dhënë fund praktikës së tanishme që të përjashtuarit nga parlamenti drejtojnë stafet elektorale e degët lokale të partive, partitë duhet të detyrohen të dëshmojnë se kanë demokraci e zgjedhje brenda tyre, administrata dhe qeveria duhet të bëjnë publike 9 muaj përpara zgjedhjeve buxhetin, strukturën, planin e investimeve dhe të aplikohet koncepti i konfliktit të interesit në proces, si dhe 34 rekomandime të tjera, u prezantuan në Komisionin e Reformës Zgjedhore në emër të Institutit të Studimeve Politike më 9 mars 2018.
REKOMANDIMET E PLOTA TE ISP MUND TE GJENDEN NE LINKUN ME POSHTE
