Në bashkëpunim me grupet parlamentare në Kuvend, Instituti i Studimeve Politike dhe ambasada holandeze organizuan me 26.10.2018 workshop-in me temë “Përfaqësimi parlamentar, llogaridhënie dhe transparenca” me të ftuar të veçantë ekspertin holandez, Michiel van Hulten, ish politikan i njohur e me përvojë në vendin e tij dhe ish anëtar në Parlamentin Evropian. Pjesëmarrës në workshop ishin deputetë nga grupet parlamentare PS, PD dhe LSI, kryesisht deputetë të zgjedhur për herë të parë në parlament, si dhe përfaqësues nga stafet e grupeve parlamentare, nga administrata e Kuvendit dhe ekipi monitorues i ISP për Kuvendin. Në workshop mori pjesë dhe përshëndeti edhe ambasadorja e Mbretërisë së Holandës në Shqipëri, zj. Guusje Korthals Altes, e cila vlerësoi rëndësinë dhe rolin kushtetues të parlamentit në një demokraci funksionale si dhe përgjegjësinë për aktivitet sa më profesional dhe transparent.
Gjatë workshopit me deputetët u diskutuan gjerësisht problematika të ndryshme të aktivitetit parlamentar, përfshirë raportet midis deputetëve dhe elektoratit, deputetëve dhe medias, deputetëve dhe grupeve të interesit, deputetëve dhe partive politike, të drejtat dhe përgjegjësitë e deputetëve, çështje që lidhen me standardet mbështetëse në ushtrimin e funksionit të tij, etj. Pjesë e debatit ishin edhe çështje konkrete që kanë të bëjnë me ligjërimin politik dhe publik të deputetëve, me praktikat e vendimmarrjes, të konfliktit të interesit, të konsultimit publik dhe të ndërhyrjeve përmirësuese në rregulloren ose në statusin për deputetët. Në këto dhe elementë të tjerë të debatit, eksperti i ftuar solli praktikat e mira të vendeve perëndimore dhe ofroi sugjerime përkatëse në lidhje me shqetësimet dhe vlerësimet e debatuara në tryezë.
Aktiviteti shënon fillimin e një serie nismash të ngjashme të Kuvendit në funksion të forcimit të kapaciteteve të deputetëve dhe të kualifikimit të vazhdueshëm me njohuri e praktika të mira të jetës parlamentare. Organizata inicuese, Instituti i Studimeve Politike, është një think-tank me fokus kryesor në monitorimin e Kuvendit (www.deputetim.al) dhe aktivitetit parlamentar në Shqipëri, proces që e vijon prej vitit 2016 me mbështetjen e qeverisë holandeze dhe partnerëve të tjerë ndërkombëtarë.
