Kuvendi i RSH ësthtë institucioni kushtetues kryesor në sistemin tonë qeverisës, është organi legjislativ dhe kontrollues i zbatimit të ligjit. Një monitorim i ISP tregon se institucioni që duhet të ishte model për zbatimin e ligjit, në fakt vijon të mos zbatojë një detyrim ligjor që e ngarkon atë vetë me përgjegjesi.
Ligji i dekriminalizimit ngarkon me përgjegjësi Kuvendin e RSH të miratojë listën e shteteve ku aplikohen veprat penale ndaluese për individët që duan të kandidojnë për poste politike dhe publike. Afati për hartimin e listës së vendeve ka skaduar në mars-prill 2016. Prej 5 vitesh Kuvendi ka refuzuar të marrë në shqyrtim dhe të hartojë listën e vendeve ku ushtron efektet e tij ligji shqiptar i dekriminalizimit. ISP ka adresuar letra dhe rekomandime tek Kuvendi për zbatimin e përgjegjësisë së tij ligjore, por institucioni nuk ka kryer asnjë akt serioz administrativ dhe as vendimmarrës lidhur me këtë detyrim.
Zgjidhja? Kuvendi duhet të hartojë e miratojë sa më parë listën e vendeve ku ushtron efektet ligji 138/2015, si dhe në vazhdimësi të përditësojë të dhënat, në varësi nga ndryshimet politike në raportet midis shteteve të ndryshme, BE dhe zhvillimeve të tjera gjeopolitike.
Instituti i Studimeve Politike po zbaton projekti “Promovimi i llogaridhënies së zyrtarëve të zgjedhur”, i cili mbështetet financiarisht nga NED (National Endowment for Democracy).
