Detyrimi ligjor: Më 26 prill 2021 një deputet dhe kryetar i një subjekti politik ka depozituar me shkrim në KQZ kërkesën për dorëheqje nga mandati aktual dhe mandati i ri parlamentar. Subjekti ishte pjesë e listës prioritare të verifikimeve të KQZ në kuadër të dekriminalizimit.
Problemi? Deputeti i dorëhequr vijon të mos jetë i zëvendësuar sipas procedurës ligjore në parlamentin aktual, ndërkohë që Prokuroria dhe KQZ nuk kanë dhënë ende përgjigje për rekordet e tij në zbatim të ligjit të dekriminalizimit. Dorëheqja mund të përbëjë alibi për t’i ikur procesit të verifikimit në kuadër të dekriminalizimit, ndërkohë që deri në dhënien e mandatit dhe më pas dorëheqjen prej mandatit KQZ ka kohë të mjaftueshme për verifikime.
Zgjidhja? KQZ dhe Prokuroria duhet të kryejnë plotësisht verifikimin bazuar në standardet e dekriminalizimit dhe integritetit për deputetin Doshi, si dhe ndërkohë që KQZ dhe Kuvendi duhet të bëjnë zëvendësimin e mandatit të tij aktual me emrin pasues në listën shumëemërore të vitit 2017.
Instituti i Studimeve Politike (ISP) është duke monitoruar KQZ dhe fushatën elektorale, si pjesë të angazhimit në projektin “Monitoring the 2021 Parliamentary Elections in Albania” mbështetur financiarisht nga qeveria e Mbretërisë së Bashkuar përmes ambasadës britanike në Tiranë.
