Ndikimi i madh në publik dhe në vendimmarrje i partive politike parlamentare i ngarkon ato me përgjegjësi edhe për të ofruar modele pozitive dhe standarde integriteti. Partitë mund të luajnë rol aktiv dhe efektiv në rritjen e kulturës demokratike, në jetësimin e transparencës dhe të llogaridhënies. Parimet e nenit 9 të Kushtetutës së RSH dhe legjislacioni mbi partitë politike u njohin partive të drejta dhe përgjegjësi, të cilat duhen respektuar dhe përmbushur.
Instituti i Studimeve Politike (ISP) shpreh keqardhjen dhe zhgënjimin me retorikën publike/politike të përdorur ditët e fundit nga liderit kryesorë të partive politike parlamentare, përfshirë kryeministrin. Gjuha denigruese ndaj Tjetrit, bullizuese, kërcënuese dhe përjashtuese janë sa devijime nga standardet e integritetit, aq edhe akte që vijnë ndesh me legjislacionin, Kodet e Etikës dhe vlerat e një shoqërie demokratike. Për shkak të mbipushtetit personal dhe institucional deklaratat e liderëve politikë bëhen “ushqim” për ndjekësit besnikë dhe kështu, përcjellin një model negativ në diskursin publik dhe në ecurinë e pluralizmit politik në Shqipëri.
ISP shpreh gjithashtu keqardhjen që partitë politike, përmes gjuhës denigruese ose promovuese të bazuar në lexime e interesa thellësisht politike dhe në konflikt personal interesi, i japin vetes të drejtë të marrin rolin e gjykatave dhe të prokurorisë, të policisë dhe të organeve ligjzbatuese. Konceptet e partisë-shtet, të diktimit vendimmarrës apo të paprekshmërisë së partisë/udhëheqësve politikë janë koncepte të një kulture dhe sjelljeje që Shqipëria duhej ta kishte lënë pas në dhjetor 1990.
ISP apelon partitë politike të zbatojnë Kodet e tyre të Etikës dhe standardet e integritetit që kanë në dokumentet rregullatore të brendshme, të korrektojnë qasjen e tyre ndaj rasteve abuzive me ligjin, të respektojnë parimet e dekriminalizimit, si dhe të dëshmojnë maturi dhe qytetari ndaj Tjetrit dhe mendimit ndryshe.
Shteti, qytetarët dhe shoqëria shqiptare meritojnë më shumë respekt, sfidat dhe koha kërkojnë politikë të pastër dhe politikanë me integritet.
