Standardet e integritetit në partitë politike dhe në vendimmarrje nuk janë slogane dhe as iluzione, – ato janë e mbeten sfida prioritare për një Shqipëri me demokraci funksionale, shtet të së drejtës dhe të maturuar në rrugën e anëtarësimit në BE. Qytetarët aktivë, pjesëmarrës dhe të pavarur, reagues/refuzues ndaj fenomeneve negative dhe zëlartë në shprehjen e kërkesave dhe opinioneve të tyre të lira janë garancia për ndryshim cilësor për shtetin dhe shoqërinë.
- Cilat janë përvojat e deritanishme dhe pritshmëritë për zgjedhjet 2025?
- Cila është rëndësia e integritetit në të gjitha nivelet e përfaqësimit?
- Cilat janë vlerësimet qytetarëve për integritetin e partive/kandidatëve?
- Cila është përgjegjësia e shoqërisë civile, medias dhe institucioneve?
- Sa mund të ndikojnë të rinjtë për një politikë të pastër / me integritet?
- Cili është kontributi që mund të ofrojnë institucionet e dijes/ekspertët?
Këto ishin disa nga pyetjet që u trajtuan në diskutimin e zhvilluar në Korçë me studentë, përfaqësues të shoqërisë civile dhe ekspertë në fushën e zgjedhjeve dhe përfaqësimit. Në moderimin e aktivistes së shoqërisë civile Xhensila Mirashi pjesë e diskutimit konstruktiv u bënë profesorët Elda Panariti, Ervin Karamuço dhe Afrim Krasniqi, koordinatorja e ISP Juljana Bilbilaj, gazetari i njohur Ilir Jano, juristi Esmerald Xhafa, etj.
Ky Open Forum realizohet në kuadër të projektit “Fuqizimi i integritetit të zgjedhjeve dhe i qëndrueshmërisë së partive politike”, loti “Forcimi i rolit monitorues dhe kërkesës së llogarisë nga qytetarët nëpërmjet shoqërisë civile, medias dhe mbështetjes akademike”, zbatuar nga Komiteti Shqiptar i Helsinkit (KSHH) në partneritet me Institutin e Studimeve Politike (ISP), BIRN Albania dhe Qëndresa Qytetare (QQ), mbështetur financiarisht nga Ambasada Britanike.
