E dini? Shqipëria është një nga vendet e vetme, e cila pa qenë në luftë si Kosova, Bosnja, Kroacia, Ukraina, etj, vijon të ketë ende qytetarë pa varr të identifikuar të ekzekutuar?
Ndryshimi i sistemit nuk solli zbardhjen e krimeve të sistemit të kaluar dhe as rivendosje të drejtësisë, përfshirë identifikim të plotë dhe integrim të ish viktimave politike. Vrasjet në kufi më 1989-1990 janë dëshmia më e freskët, kur ekzekutimet u bënë nga shteti, por vetë shteti nuk ka arritur ende të bëjë identifikimin e plotë të varreve dhe rasteve.
Shqipëria regjistron numrin më të madh të viktimave në kufi përgjatë viteve të fundit 1988-1990, ndonëse prej muajit maj 1990 vrasjet dhe masat e tjera represive në kufi konsideroheshin në kundërshtim edhe me Kodin Penal dhe Kushtetutën e kohës.
Cilat janë sfidat përballë nevojës për drejtësi, memorie dhe kujtesë? Cilat janë përgjegjësitë e pa përmbushura të institucioneve? Si trajtohen ngjarjet e vitit 1988-1990 në tekstet dhe aktivitetin mësimor? Sa e informuar është rinia dhe sa interes informativ kërkojnë të rinjtë? Cilat janë përvojat e vendeve ish komuniste në trajtimin e rasteve të njëjta? Shqipëria në BE dhe sfida për kulturë politike, historike, të drejta të njeriut.Për të diskutuar mbi këto tematika ISP zhvilloi një forum të hapur me studentë të Universitetit F.Noli në Korçë “Memoria dhe kujtesa: Viktimat e kufirit gjatë viteve 1988-1990”. Pjesëmarrës dhe referues ishin përfaqësues nga ICMP, si dhe personalitete të njohura ish të burgosur politikë.
Aktiviteti u organizua nga Instituti i Studimeve Politike (ISP) dhe Shoqata Antikomuniste e Ish-të Përndjekurve Politik Demokrat të Shqipërisë, mbështetur financiarisht nga Komisioni Ndërkombëtar për Personat e Zhdukur (ICMP) përmes grantit nga Bashkimi Evropian në Programin e ICMP-së për Ballkanin Perëndimor.
Link: https://www.linkedin.com/posts/instituti-i-studimeve-politike-institute-for-political-studies-07233557_e-dini-shqip%C3%ABria-%C3%ABsht%C3%AB-nj%C3%AB-nga-vendet-e-activity-7308076845348843520-yvHR/?
