Më shumë se tri dekada pas nisjes së tranzicionit dhe 9 vjet pas miratimit të “ligjit të dekriminalizimit” ende kemi zyrtarë që rezultojnë me rekorde kriminale, që fshehin të dhënat në formularë apo që refuzojnë deklarimin paraprak në formular.
Të dhëna kritike të evidentuara nga stafi monitorues i Institutit të Studimeve Politike (ISP) në sistemin e administratës publike, në institucione të rëndësishme publike dhe të pavarura, në nivele të ndryshme të sistemit të drejtësisë, të policisë, të shërbimeve publike, etj, tregojnë se ende, individë me rekorde negative penale, vijojnë të promovohen, emërohen apo zgjidhen në poste drejtuese. Institucionet bëjnë deklarime formale, por jo verifikime shteruese paraprake.
E njëjta situatë me partitë: ato ende nuk kanë miratuar kriterin, sipas të cilit, individë të tillë përjashtohen nga anëtarësia apo sistemi i karrierës në parti dhe për verifikimet paraprake të kandidatëve për zgjedhjet vendore dhe parlamentare.
-
A mundet që Shqipëria të ketë zyrtarë të zgjedhur ose të emëruar të pastër dhe të ndershëm?
-
A ka vullnet dhe mundësi që shoqëria të shmangë përmes votës individët me rekorde negative kriminale apo korruptive?
-
A beson brezi i ri se faza e re e bisedimeve për anëtarësim në BE mund të bazohet në meritokraci, transparencë dhe llogaridhënie?
-
A ka pritshmëri brezi i ri për parlament dhe institucione më me integritet, më të besueshme dhe më profesionale?
-
A ka shoqëria shqiptare modele pozitive frymëzuese të zyrtarëve të pastër dhe me integritet?
-
A mund të kemi veting/parandalim në institucionet akademike, universitare, në administratë dhe shërbimet publike?
-
A përbën kriteri i dekriminalizimit mekanizmin e mjaftueshëm mbrojtës për integritetin e institucioneve?
Këto ishin disa prej temave të diskutuara në debatin e zhvilluar nga ekspertët e ISP-së, Prof. Ervin Karamuço, Juljana Bilbilaj dhe Lili Doda me nxënës e përfaqësues të grupeve rinore në Pogradec, në kuadër të projektit “Promovimi i llogaridhënies së zyrtarëve të zgjedhur”, i mbështetur nga National Endowment for Democracy (NED) dhe realizuar nga Instituti i Studimeve Politike (ISP).
