Kjo legjislaturë parlamentare përfundon në shtator 2025, pasi më 11 maj do të zgjidhet parlamenti i ri. Pavarësisht procesit zgjedhor dhe rezultatit të tij, funksionet parlamentare mbeten të njëjta dhe procesi i raportimeve vjetore dhe ai zgjedhor mbeten pjesë prioritare e agjendës.
Gjatë vitit 2024, ISP ka monitoruar standardet e jetësimit të funksionit mbikëqyrës të Kuvendit, duke i krahasuar ato edhe me gjetjet e vitit 2023. Nga ky monitorim ISP ka evidentuar disa tregues pozitivë dhe kritikë, duke adresuar një sërë rekomandimesh për vitin 2025.
Nga monitorimi i vitit 2024, lidhur me funksionin mbikëqyrës të Kuvendit rezulton se:
- Kuvendi ka reflektuar pozitivisht ndaj kërkesave ligjore, kritikave dhe rekomandimeve të ardhura nga institucione ndërkombëtare dhe shoqëria civile;
- Kuvendi ka pranuar parimisht propozimet për rishikimin dhe përmirësimin e kuadrit ligjor rregullator për mbikëqyrjen dhe raportimet vjetore;
- Kuvendi ka përfshirë në prioritete përmirësimin e sistemit online dhe atij ndërinstitucional lidhur me rekomandimet reciproke dhe ndjekjen e tyre;
- Kuvendi është përfshirë në disa tryeza dialogu me institucionet e pavarura për të debatuar e adresuar problematika lidhur me procesin raportues;
- Kuvendi ka miratuar Udhërrëfyesin për Funksionimin e Institucioneve Demokratike, pjesë e të cilit janë angazhimet lidhur me standardet e rolit mbikëqyrës;
- Kuvendi dhe institucionet e pavarura i janë përgjigjur pozitivisht ftesave dhe tryezave të shoqërisë civile për diskutuar mbi gjetje, vlerësime dhe rekomandime.
Gjatë vitit 2025 sfidat kryesore të jetësimit të standardeve më të larta të funksionit mbikëqyrës janë:
- Reformimi i kuadrit ligjor rregullator përpara nisjes së legjislaturës së re parlamentare;
- Sigurimi i një procesi të hapur, konsensual dhe gjithëpërfshirës mbi raportimet vjetore;
- Reagimi reflektues ndaj raporteve të BE dhe SHBA lidhur me llogaridhënien dhe transparencën;
- Marrja e masave për realizimin e raportimeve vjetore pavarësisht fushatës elektorale;
- Akte konkrete në përmirësimin dhe modernizimin e sistemit online të faqes së Kuvendit.
Ky infografik është përgatitur në kuadër të projektit “Rritja e llogaridhënies së qeverisë përmes një Parlamenti më reagues”, i cili realizohet nga Fondacioni Westminster për Demokraci (WFD) me mbështetje financiare nga Ambasada Britanike në Tiranë. Informacioni dhe pikëpamjet e shprehura në këtë factsheet janë ato të ISP-së dhe nuk pasqyrojnë domosdoshmërisht opinionin zyrtar të WFD-së, financuesve të saj apo Qeverisë së Mbretërisë së Bashkuar. As WFD dhe as ndonjë person që vepron në emër të saj, nuk mund të mbahet përgjegjës për përdorimin që mund t’i jetë bërë informacionit që ai përmban.
