15 shtatori është Dita Ndërkombëtare e Demokracisë. Shqipëria vijon prej vitit 1991 në kërkim të demokracisë funksionale dhe premtimit për “një Shqipëri demokratike si gjithë Europa”!
Në këtë ditë simbol Instituti i Studimeve Politike (ISP) shpreh shqetësimin se:
- Kuvendi i RSH krijoi precedent negativ me refuzimin e vendimit të Gjykatës Kushtetuese lidhur me mandatin e deputetes Xhaçka. Akti vjen ndesh edhe me retorikën për Komisionin Antikorrupsion, kur të njëjtët deputetë të tij refuzuan vendimin e GJK kundër korrupsionit.
- Partitë politike po zhvillojnë procese të brendshme zgjedhore pa garë, transparencë, sistem meritokracie dhe as respektim të standardeve të integritetit. Koncepti jodemokratik i emërimeve ka zëvendësuar konceptin demokratik të zgjedhjeve konkurruese te partitë.
- Një sërë institucionesh kushtetuese ose të pavarura janë vakante ose jashtë mandatit të tyre legjitim. Krahas funksionit kontrollues ndaj ekzekutivit, Kuvendi ka dështuar të përmbushë edhe funksionin e vet zgjedhor. Dobësimi i institucioneve të pavarura e kushtetuese passjell dobësimin e standardeve të demokracisë dhe shtetit të së drejtës.
- Sistemi politik dhe përfaqësues është në stanjacion. Mungon rotacioni i elitave politike, reforma zgjedhore dhe e përfaqësimit politik nuk është realizuar, burimet informale vijojnë të jenë burime mbështetëse të sistemit të patronazhizmit politik, si dhe se retorika politike denigruese ndaj zërave kritikë dhe institucioneve të pavarura përbën një tjetër zhvillim negativ.
Dita e Demokracisë apelon lidershipin partive politike si dhe institucionet dhe organet përfaqësuese, për një qasje të re reformatore, transparente, gjithëpërfshirëse dhe llogaridhënëse ndaj qytetarëve, nevojës jetike për reforma dhe sfidës së vonuar për kalimin nga demokracia hibride tek demokracia funksionale.
Shqipëria ka nevojë për politikanë të pastër, politika vizionare dhe institucione me integritet.
Instituti i Studimeve Politike (ISP)
