12 mars 2025, afati fundor i dorëzimit të listave të kandidatëve për deputetë në KQZ. Fushata de facto nis nesër. Duke monitoruar procesin zgjedhor, standardet e integritetit, burimet shtetërore dhe hetimet ndaj krimit zgjedhor tri organizata, – Komiteti Shqiptar i Helsinkit (KShH), Qëndresa Qytetare (QQ) dhe Instituti i Studimeve Politike (ISP), prezantuan sot përpara medias disa qëndrime të përbashkëta.
🔎 Vota e diasporës. Mbështetje procesit, por apel institucioneve / partive për të evituar aplikimin e dy standardeve në zgjedhje, një brenda vendit dhe një në diasporë.
🔎 Integriteti i kandidatëve. Asnjë parti nuk shfrytëzoi mekanizmin ligjor për verifikime paraprake në Prokurori/ AIDSSH. Apel për evitimin e kandidatëve në hetime nga SPAK dhe të përfshirë në skandale korruptive apo abuzuese.
🔎 Integriteti i zgjedhjeve. Partitë e kandidatët të prezantojnë programe dhe të debatojnë mbi to. Apel për dhënie fund të retorikës së personalizuar e denigrues, gjuhën e ashpër dhe klimën tensionuese.
🔎 Administrimi i procesit zgjedhor. Shqetësime për pamundësinë e ushtrimit të votës për kategori sociale në pamundësi, PAK, etj, dhe për interpretimet e ndryshme të dispozitave ligjore nga strukturat përbërëse të KQZ, për mos mbulimin e plotë të monitorimit të shpenzimeve financiare të kandidatëve dhe subjekteve. Apel për hetime dhe masa parandaluese të keqpërdorimit të burimeve shtetërore.
🔎 Krimi zgjedhor. Shqetësim që ka ende procese hetimi të pambyllura për krimet zgjedhore që kanë ndodhur në raport me zgjedhjet e fundit, mbështetje e nxitje të SPAK / Prokurori të kryejnë verifikime dhe/ose hetime objektive, në kohë të arsyeshme dhe të gjithëanshme, ndaj çdo rasti të dyshuar të krimit zgjedhor, para dhe gjatë fushatës elektorale. Apel qytetarëve për denonëncime dhe medias për raportim shterues.
🔎 KSHH-ISP-QQ do monitorojnë procesin. Gjetjet do jenë gjithnjë publike. Apel medias të jetë sa më aktiv në partneritetin tonë në interes të qytetarëve, si dhe apelojmë partitë politike dhe kandidatët të respektojnë parimet dhe standardet e monitorimit të tyre, si element thelbësor në një proces zgjedhore dhe demokraci funksionale.
Komiteti Shqiptar i Helsinkit (KSHH), Instituti i Studimeve Politike (ISP), BIRN Albania dhe Qëndresa Qytetare (QQ), janë angazhuar në kuadër të projektit “Fuqizimi i integritetit të zgjedhjeve dhe i qëndrueshmërisë së partive politike”, loti “Forcimi i rolit monitorues dhe kërkesës së llogarisë nga qytetarët nëpërmjet shoqërisë civile, medias dhe mbështetjes akademike”, mbështetur financiarisht nga Ambasada Britanike.
