Me një procedurë të përshpejtuar dhe në prag të fushatës elektorale, mazhoranca inicioi në muajin mars 8 projektligje, të cilat preknin në një masë të madhe paketën e reformës në drejtësi. Momenti i zgjedhur dhe procedura e përshpejtuar e ndjekur për kalimin e miratimin e tyre në seancë plenare, pa konsultim publik dhe pa respektuar mesataren e kohës minimale që iu është lënë nismave të tjera ligjore në praktikat tona parlamentare, më 23 mars parlamenti miratoi të gjitha ndryshimet. Ndryshimet në vetvete nuk paraqisnin nisma për përmirësime ligjore, por edhe ndryshime mbi vetë ndryshimet e ndodhura vetëm pak kohë më parë. Konkretisht, u bënë amendime e ndryshime në ligjin nr. 149/2020 “Për disa ndryshime në ligjin nr. 96/2016, “Për statusin e gjyqtarëve dhe prokurorëve në Republikën e Shqipërisë”, i ndryshuar”, i cili ishte miratuar në datën 17 dhjetor 2020 dhe pa kaluar as 3 muaj nga ndryshimi i parë i tij bëhen përsëri ndryshime ne të.
Ligjet e mësipërme u miratuan mbi mungesën e konsensusit të gjerë politik pozitë – opozitë, ndërkohë që duhet të jetë e kundërta ato duhet dhe mund të gëzojnë një mbështetje të gjerë politike. Përpara kalimit në seancë pati shumë zëra nga jeta civile që sugjeruan që shtyrjen e shqyrtimit pas konstituimit të Kuvendit të ri të dalë nga zgjedhjet në 25 prill 2021, një propozim i arsyeshëm që nuk u mor në konsideratë nga Kuvendi i Shqipërisë.
ISP është duke monitoruar institucionet kryesore të drejtësisë, si dhe Kuvendin, Qeverinë dhe Presidentin, në kuadër të projektit “Reforma: për një ritëm cilësor. Monitorim, sensibilizim dhe asistencë”, me mbështetjen e programit të shtetit të së drejtës të fondacionit Shoqëria e Hapur për Shqipërinë.
Analiza me e plote e eksperteve te ISP mbi ndryshimet dhe impaktin, mund te lexohet ketu:
ISP – Vleresim per nismen ligjore per ndryshimin e ligjeve te reformes ne drejtesi 2021
