Kushtetuta i njeh të drejtën çdo shtetasi me të drejtë vote ta ushtrojë atë në mënyrë të fshehtë dhe të lirë. Prej një viti Shqipëria është përfshirë në epideminë e COVID-19, duke sjellë kufizime në aktivitetet politike e publike, si dhe ndikime të ndryshme për jetën sociale, shëndetin apo liritë qytetare. Masat mbrojtëse parashikojnë kufizime në lëvizje brenda dhe jashtë vendit, detyrim të pacientëve për trajtim në izolim në banesë apo për trajtim të avancuar mjekësor në spitale, kontroll të vazhdueshëm mjekësor dhe parandalim të grumbullimeve në mjedise të hapura apo të mbyllura.
Procesi zgjedhor i 25 prillit pritet të përballet me një numër të lartë të qytetarëve në trajtim mjekësor apo kufizime të lëvizjes, me interes të madh për votim në qendrat e votimit, me nevoja për lëvizje të komisionerëve nga qendrat e votimit deri tek ato të numërimit, me nevoja për trajnime, si dhe me procedura të gjata numërimi dhe administrimi deri në nxjerrjen e rezultateve të plota.
Për të gjitha këto faza të procesit zgjedhor ende mungon një bazë e qartë rregullatore dhe aktet nënligjore garantuese për ushtrimin e të drejtës së votës për çdo shtetas që e posedon atë, si dhe një plan masash mbrojtëse të dedikuara për zgjedhjet nga organet përgjegjëse të shëndetësisë.
Bazuar në frymën kushtetuese dhe në praktikat e mira të vendeve të tjera, Instituti i Studimeve Politike inkurajon KQZ-në të hartojë në kohë akte nënligjore dhe të sigurojë bashkëpunimin e nevojshëm me organet e tjera për të mundësuar zgjidhjen e të gjitha problematikave të mësipërme të procesit zgjedhor.
https://youtu.be/Wu_6oFpDd-U
Instituti i Studimeve Politike (ISP) është duke monitoruar KQZ dhe fushatën elektorale, si pjesë të angazhimit në projektin “Monitoring the 2021 Parliamentary Elections in Albania” mbështetur financiarisht nga qeveria e Mbretërisë së Bashkuar përmes ambasadës britanike në Tiranë.
