30 vjet pas ndryshimit të sistemit politik në Shqipëri shoqëria jonë përballet ende me sfidën e dialogut dhe memories mbi të kaluarën. Përvoja e shumë prej vendeve ish komuniste tashmë anëtare në BE na mëson se një nga faktorët e suksesit të modeleve të tyre të tranzicionit ishte edhe aftësia për të kapërcyer trashëgimitë dhe kujtimet negative të regjimeve totalitare përmes drejtësisë, reflektimit dhe memories qytetare. Çështjet e mohimit të lirive themelore universale, të persekutimit për shkak të bindjes politike, të luftës së klasave, internimeve dhe dënimeve kolektive, të diferencimit mbi baza ideologjike, të emërimit të karrierës dhe censurës së rreptë mbi krijimtarinë, të kufizimit e më pas ndalimit të besimit fetar, të lëvizjes së lirë dhe marrëdhënieve të komunikimit me vendet e tjera, të indoktrinimit të sistemit shkollor dhe të uniformitetit të jetës në shoqëri, të izolimit nga bota e zhvilluar dhe të mungesës së konceptit të drejtësisë, etj, janë tipare të analizës dhe perceptimit mbi të kaluarën dhe ndikimet e saj në formimin tonë kulturor, shoqëror e shtetëror.
Brezat e sotëm të studentëve kanë lindur rreth një dekadë pas rënies së sistemit komunist. Ata jetojnë në një ambient të ri shoqëror, në një sistem të ri politik, kushtetues e përfaqësues, në një raport të ri midis shtetit, shoqërisë e individit, në një marrëdhënie të re të Shqipërisë me Perëndimin dhe pjesën tjetër të botës, si dhe në një hapësirë pafund të marrjes dhe përpunimit të informacionit. Perceptimi i tyre për të kaluarën, memorien historike, procesin e ndarjes prej saj, sidomos në elementët e të drejtave të njeriut, është e mbetet me interes kërkimor. Për këtë qëllim, Instituti i Studimeve Politike (ISP) me mbështetjen e programit TRANSITION të Ministrisë së Jashtme të Republikës së Çekisë ka planifikuar një konkurs me ese nga studentë të universiteteve publike e private. Çdo këndvështrim brenda tematikës është i mirëpritur.
Afati i paraqitjes së tyre është data 15.06.2020, madhësia jo më shumë se 5 faqe, gjuha shqip, si dhe forma e trajtimit sipas rregullave të shkrimit akademik. Për të gjithë studentët pjesëmarrës do të ketë një honorar nga ISP, punimet do të publikohen online, si dhe për fituesit do të ketë çmime vlerësuese.
Për çdo informacion të mëtejshëm mund të na kontaktoni në çdo kohë në një nga adresën e mëposhtme të emailit: [email protected], [email protected]
Thirrja e plotë: ISP – Thirrje për esse nga studentët – memoria mbi te kaluaren dhe te drejtat e njeriut
