Më 14 maj qytetarët janë ftuar të zgjedhin me votë të fshehtë kryetarët e bashkive dhe këshillat bashkiakë. Në sistemin tonë qeverisës kryetari i bashkisë është i vetmi institucion që zgjidhet direkt nga qytetarët.
Zgjedhjet bëhen me një raund, kandidati që merr më shumë vota zgjidhet. Fituesi drejton bashkinë gjatë katër viteve të ardhshme. Ai/ajo përmes votimit fiton të drejtën të marrë vendime shumë të rëndësishme për qytetin, bashkinë, komunitetin dhe jetën tonë. Kandidatët propozohen nga partitë ose zgjedhësit, bëjnë fushatë në emrin e tyre, por kur fitojnë ata përfaqësojnë të gjithë zgjedhësit, përfshirë edhe ata që kanë votuar kundër.
Votimi për këshillat bashkiak bëhet duke votuar për subjektin zgjedhor. Këshilltarët zgjidhen indirekt, bazuar në renditjen e tyre nga partia ose subjekti politik. Këshillat bashkiakë luajnë rolin e parlamentit për bashkitë. Vendimet e tyre kanë impakt të shumëfishtë, aftësia dhe vota e tyre ndikojnë në cilësinë e qeverisjes dhe në standardet e jetës së banorëve.
Qytetarët mbi 18 vjeç kanë të drejtë vote. Ata duhet të zgjedhin një kandidat për kryetar bashkie dhe një subjekt politik për këshillin bashkiak. Votat e pavlefshme dhe kundër të gjithëve nuk përfaqësohen. Vota është personale. Votat e deleguara, votimi familjar apo trafikimi i votës ndalohen me ligj.
Informohuni mbi programet e kandidatëve, CV-të e tyre, premtimet dhe alternativat. Informohuni për mënyrën e votimit. Ushtroni lirshëm përgjegjësitë qytetare.
Koha që zgjedhjet të ofrojnë zgjidhje.
Koha për standarde, zgjedhje të lira dhe të drejta.
Kjo video bëhet në kuadër të projektit “Partneritete të forta për reforma të qëndrueshme – Forcimi i rolit të shoqërisë civile në adresimin e sfidave të zgjedhjeve të lira dhe të drejta”, mbështetur nga Ambasada e Mbretërisë së Vendeve të Ulta përmes programit MATRA. Përmbajtja e dokumentit është përgjegjësi vetëm e autorit dhe e Institutit të Studimeve Politike.
