Qytetarët e bashkisë Rrogozhinë janë qytetarët më kritikë në raport me impaktin e deritanishëm të reformës territoriale në shërbimet që u ofrohen qytetarëve. Diferenca midis pritshmërive, premtimeve dhe standardit të shërbimeve, të cilat në shumicën e tyre ende ofrohen nga drejtori rajonale në Tiranë, Durrës apo Kavajë, ngrihet si problematikë edhe në takimin që Instituti i Studimeve Politike zhvilloi me të rinjtë e gjimnazit të përgjithshëm Haxhi Qehja në Rrogozhinë. Aktiviteti u bë në kuadër të projektit “Bashkitë e qarkut Tiranë: transparenca, qeverisja qytetare dhe llogaridhënia” mbështetur nga Lëviz Albania.
Në bashkëbisedim të rinjtë u njohën me gjetje të rëndësishme të anketimeve dhe monitorimeve që ISP ka zhvilluar për bashkinë Rrogozhinë, këshillin bashkiak dhe institucionet e tjera vendore, me problematikat e qeverisjes vendore në përfundim të mandatit të parë me ndarjen e re territoriale, si dhe me treguesit e nivelit të transparencës, llogaridhënies dhe pjesëmarrjes qytetare. Të rinjtë pjesëmarrës treguan interes të madh mbi problematikat e qeverisjes vendore, sidomos lidhur me shërbimet publike, shërbimet që lidhen me shkollën dhe komunitetet lokale, me aktivitetet rinore dhe me hapësirat për pjesëmarrje të tyre në vendimmarrjet lokale. Ata ishin aktivë në ngritjen e problemeve që i shqetësojnë dhe në vlerësimin e nevojave më emergjente që kanë për përmirësimin e situatës si dhe për afrimin më të madh të qeverisje lokale me shkollat dhe komunitetin e nxënësve.
Aktiviteti, ku folës kryesor ishte eksperti i ISP, Ervin Karamuço, vijoi më pas me bashkëbisedim ndërveprues mbi çështje konkrete. Aktiviteti është pjesë e një liste të gjatë aktivitetesh të njëjta që ISP po zhvillon në shkolla të mesme, universitete publike e private, si dhe grupime komunitare në secilën prej pesë bashkive të qarkut Tiranë.
