Administrata e pavarur vs administrata ne zgjedhje/fushate elektorale? Standardi i nevojes per ndalimin e perdorimit te burimeve shteterore ne fushate elektorale eshte nje prej rekomandimeve prioritare te raportit te fundit te ODIHR/OSBE. Megjithate ka raportime te shumta se administrata vijon te jete aktive ne aspekte te ndryshme te fushates, perfshire dhe gjate orarit te punes zyrtare.
Detyrimi ligjor
Ligji 152/2013 përcakton kufizimet për ushtrimin e të drejtave politike për nëpunësit civil. Kodi Zgjedhor dhe legjislacioni mbi administratën publike përcaktojnë gjithashtu kufizime për sjelljen e nëpunësve dhe administratës gjatë fushatave elektorale dhe aktiviteteve politike. DAP është institucioni përgjegjës për zbatimin e legjislacionit mbi nëpunësit publike.
Problemi
Nga të dhënat monitoruese dhe raportimet kritike të medias dhe të palëve politike në zgjedhje rezulton se një numër i madh i punonjësve me status civil dhe të administratës publike janë përfshirë në fushatë elektorale brenda orarit zyrtar të punës. Ata përfshihen në aktivitete politike, në propagandën elektorale dhe në debatet politike të ditës, kryesisht në mediat sociale.
Zgjidhja
DAP duhej të kishte miratuar një udhëzues për sjelljen e administratës publike dhe të nëpunësve civilë gjatë fushatës elektorale, KQZ duhej të kishte kërkuar nga institucionet shtetërore dhe publike një sistem monitorimi, verifikimi dhe reagimi në zbatim të kritereve që kërkon një proces zgjedhor me standarde.
Instituti i Studimeve Politike (ISP) është duke monitoruar KQZ dhe fushatën elektorale, si pjesë të angazhimit në projektin “Monitoring the 2021 Parliamentary Elections in Albania” mbështetur financiarisht nga qeveria e Mbretërisë së Bashkuar përmes ambasadës britanike në Tiranë.
