Miratimi i ligjeve është një proces me rëndësi, por vetëm plotësimi i tyre me akte nënligjore funksionale sjell krijimin e kushteve për zbatimin e tyre. Monitorimi i kryer nga Instituti i Studimeve Politike (ISP) mbi nxjerrjen e akteve nënligjore dhe impaktin e tyre në shoqëri, tregon se niveli i zbatimit të ligjit në fusha të rëndësishme të shërbimeve dhe të vendimmarrjes, ende është i brishtë. Rreth gjysma e ligjeve nën monitorim nuk janë shoqëruar me nxjerrjen e akteve nënligjore, më shumë se dy të tretat i kanë nxjerrë aktet nënligjore jashtë afatit ligjor dhe se Shqipëria nuk ka ende një sistem funksional të kontrollit të zbatimit të ligjeve.
Në funksion të projektit mbi monitorimin e akteve nënligjore dhe impaktit të tyre, ISP organizoi sot një forum online me ekspertë të fushës, studio ligjore, studentë të fakulteteve të drejtësisë, etj.
Prej gjetjeve nga ekspertët dhe bashkëbisedimi u ngritën shqetësime lidhur me mungesën e akteve ligjore në fusha të ndryshme, me nivelin e kulturës juridike, me gjuhën dhe terminologjinë e paqartë që në raste të veçanta përdorët në hartimin e ligjeve, me dualizmin në mbajtjen e përgjegjësive dhe me problematika të kontrastit midis të drejtave sociale dhe ekonomike që sigurojnë ligjet dhe përmbushjes së detyrimeve financiare nga organet shtetërore në jetësimin e tyre.
Gjithashtu u theksua se Fletorja Zyrtare nuk ka një sistem të publikimit organik të ligjeve (me ndryshimet periodike që ndodhin) por vijon me publikim mekanik të çdo akti dhe për pasojë, qytetari dhe zyrtarët zbatues e kanë të vështirë të kuptojë variantin e fundit të plotë të ligjit.
Debati online është pjesë e një projekti monitorues dhe sensibilizues të ISP me mbështetjen financiare nga Programi për Demokracinë, Zyra e Marrëdhënieve me Publikun në Ambasadën Amerikane në Tiranë.
