Bashkia Rrogozhinë është një prej bashkive me rritje të dyfishtë të territorit me ndarjen e re administrative. Sfidat në mirë-qeverisjen e bashkisë janë të shumta dhe vlerësimet, kërkesat dhe sugjerimet e banorëve janë të shumëllojshme. Vlerësimi unanim i këshilltarëve lokalë dhe komunitetit qytetar është apeli që disa prej shërbimeve bazë ndaj banorëve të bashkisë, përfshirë shërbimet e ndihmës sociale, shëndetësore, arsimore, hipotekore, legalizimit, etj, të zhvendosen nga Kavaja në Rrogozhinë. Kjo problematikë lë të kuptojë edhe kufizimet që qeverisja lokale ka në ushtrimin real të kompetencave dhe funksioneve të saj, si dhe hendekun midis reformës, pritshmërive qytetare dhe kapaciteteve të shtetit për të krijuar harmoni mes tyre.
Instituti i Studimeve Politike (ISP) me mbështetjen e Lëviz Albania (LA) ishte në Rrogozhinë për debat në fokus grupe me përfaqësues nga bashkia, drejtues sektorësh, këshilltarë të grupeve kryesore politike, drejtues të këshillit, përfaqësues të arsimit, kulturës dhe sektorëve të tjerë me fokus lokal.
Synimi i projektit “Bashkitë e qarkut Tiranë: transparenca, qeverisja qytetare dhe llogaridhënia” është matja e nivelit të aplikimit të këtyre komponentëve ligjore dhe nxitja e mekanizmave të rinj për promovimin e tyre. Midis pjesëmarrësve u debatua gjatë për problematikat e funksionimit të raportit këshilltar – i zgjedhur, format e komunikimit me qytetarët, përgjegjësitë e bashkive në konsultim publik dhe sistemin e llogaridhënies që ofrohet, për kërkesat prioritare të qytetarëve dhe trajtimin e tyre nga organet drejtuese në nivel bashkie e qarku.
Faleminderit këshilltarëve, pjesëmarrësve nga njësitë, bashkia, komuniteti lokal dhe OJF-të, si dhe eksperteve tanë, Afrim Krasniqi dhe Migena Kola
