Detyrimi ligjor: Kodi Zgjedhor, neni 167/2 përcakton të drejtën që çdo subjekt zgjedhor mund të kërkojë këqyrjen e fletëve të votimit ose të materialit zgjedhor, pra hapjen e kutive të votimit. Rregullatori në KQZ përcakton me akt normativ tarifat e shërbimit administrativ të këqyrjes dhe çmimin e videoregjistrimit.
Problemi: Procesi zgjedhor ka hyrë në fazën ankimore dhe KAS po merr vendimet e para, ndërkohë që Rregullatori nuk ka nxjerrë ende aktin normativ mbi tarifat e shërbimit administrativ të verifikimit të materialeve dhe votave në kutitë e votimit. Nxjerrja e aktit duhej bërë përpara se të diheshin cilat janë subjektet e interesuara dhe interesat specifike politike të tyre.
Zgjidhja? KQZ përmes Rregullatorit duhet të përcaktojë çmimet referuese dhe të nxjerrë aktin përkatës, duke mbajtur në konsideratë interesin ligjor dhe publik për transparencë të procesit zgjedhor dhe për besueshmëri të administrimit zgjedhor.
Instituti i Studimeve Politike (ISP) është duke monitoruar KQZ dhe fushatën elektorale, si pjesë të angazhimit në projektin “Monitoring the 2021 Parliamentary Elections in Albania” mbështetur financiarisht nga qeveria e Mbretërisë së Bashkuar përmes ambasadës britanike në Tiranë.
