Instituti i Studimeve Politike (ISP) shpreh mbështetjen e tij për të drejtën kushtetuese të qytetarëve për protestë paqësore dhe vlerëson angazhimin e pjesëmarrjen qytetare, veçanërisht pjesëmarrjen e brezit të ri, si një tregues të maturimit demokratik të shoqërisë shqiptare.

Qytetarët që protestojnë meritojnë të dëgjohen, të respektohen dhe kërkesat e tyre të trajtohen me seriozitet dhe respekt institucional. Demokracia funksionon përmes institucioneve dhe besimit, dialogut dhe përfshirjes, jo përmes etiketimit, denigrimit apo përjashtimit të mendimit ndryshe. Distancimi nga thirrje apo akte ekstremiste nga të gjitha palët është gjithashtu një prej nevojave dhe sfidave për aktorët e përfshirë.

ISP shpreh shqetësimin për gjuhën politike të përdorur në nivelet më të larta të politikës, përfshirë KM dhe ministra, drejtues politikë në Kuvend dhe partitë kryesore politike, e cila në shumë raste ka qenë polarizuese, denigruese, diskriminuese dhe nxitëse e konfliktualitetit social e politik. ISP vlerëson se instiucionet kryesore, sidomos parlamenti duhej të kishte një rol reflektues dhe konstruktiv në trajtimin e pakënaqësisë qytetare, si dhe organet e drejtësisë, sidomos SPAK duhet të jenë më aktiv për dhënien e drejtësisë ndaj skandaleve dhe akteve korruptive që përbëjnë burimin kryesor të reagimit qytetar.

Shqipëria, si vend kandidat për anëtarësim në Bashkimin Europian, duhet të reflektojë standardet europiane në mënyrën e trajtimit të reagimeve qytetare, duke garantuar respektimin e lirive themelore, dialogun institucional dhe përgjegjshmërinë publike.

Njëkohësisht, ISP u bën thirrje institucioneve ligjzbatuese, në veçanti Policisë së Shtetit, të zbatojnë ligjin me profesionalizëm, proporcionalitet dhe paanshmëri, të pandikuara nga konsiderata politike, duke garantuar sigurinë publike dhe mbrojtjen e të drejtave kushtetuese të çdo qytetari.

Shqipëria ka nevojë të dëshmojë se është një demokraci e pjekur, ku interesi publik, shteti i së drejtës dhe llogaridhënia mbizotërojnë mbi çdo formë oligarkie apo përqendrimi të pakontrolluar të pushtetit. Është koha për më shumë transparencë, reforma të besueshme, institucione funksionale dhe një kulturë politike që i shërben qytetarëve.

Një Shqipëri normale europiane ndërtohet mbi respektin për qytetarin, dialogun demokratik dhe sundimin e ligjit.

Instituti i Studimeve Politike (ISP)