Kuvendi nuk ushtroi funksionin e vet të raportimit të institucioneve të pavarura. Në vlerësimin e ISP-së, për herë të parë raportimi do të bëhet në sesionin e vjeshtës, pra Kuvendi do miratojë në tetor-nëntor 2025 rezolutat me rekomandime për institucionet e pavarura se çfarë do duhet të bëjnë nga janar-dhjetor 2025!
Inspektori i Lartë i Drejtësisë (ILD) është institucioni i vetëm që në situatë të tilla zgjidhi të bëj një raportim dhe diskutim të raportit vjetor me organizata të shoqërisë civile, përfshirë ISP, të cilat kanë në fokus këtë proces. Pjesëmarrës ishin edhe organizata e partnerë ndërkombëtarë, BE, OSBE, OPDAT, etj. ILD është nga institucionet e vetme që ka zhvilluar tryeza periodike konsultimi edhe gjatë viteve 2023 dhe 2024.
Gjatë takimit u diskutua në mënyrë konstruktive lidhur me ecurinë vjetore të ILD-së, cilësinë e raportimeve dhe problematikave të hasura, raportet me Kuvendin dhe institucionet e tjera, rekomandimet e inspektimeve tematike dhe nivelin e zbatimit të tyre, sistemin e ankesave dhe të transparencës, si dhe rolin e ILD-së në përmbushje të funksioneve ligjore e kushtetuese. ISP, si pjesë e organizatave pjesëmarrëse në takim, midis të tjerash ngriti edhe shqetësime që lidhen me rënien e standardit parlamentar në raportimet vjetore, rastet e konfliktit të interesit dhe retorikës politike ndaj drejtësisë, ndikimet lobuese në procesin ligjvënës ndaj legjislacionit mbi drejtësinë si dhe nevojën e një database lidhur me procesin e jetësimit të rekomandimeve të inspektimeve tematike.
ISP ka kryer monitorimin e proceseve raportuese të institucioneve 2023-2025 dhe do të vijojë të ketë rol monitorues edhe në legjislaturën e re, ndaj praktika të tilla konsultimi me institucionet dhe me parlamentin janë pozitive.
Link: https://ild.al/sq/2025/07/22/takim-pune-me-shoqerine-civile-metani-ild-eshte-e-kontrollueshme-edhe-nga-oshc-te/
