Prej disa ditësh kanë nisur konsultimet në nivel qarku për reformën e re territoriale dhe administrative. Komisioni përkatës parlamentar parashikon vendimmarrjen përpara mbylljes së sesionit aktual parlamentar (korrik 2026), ndërkohë që vitin e ardhshëm zgjedhjet vendore do të bëhen në kuadrin e reformës së re, përfshirë ndarjes së re administrative. Komisioni ka një mandat nga parlamenti, por përtej praktikës tonë të komisioneve, reformave, vendimmarrjeve politike, rishikimit të reformave, etj, etj, është mirë të drejtojmë shikimin nga praktikat e mira europiane. Edhe në formë këto të fundit ndryshojnë shumë nga praktikat tona. Një mesatare e praktikave të njëjta në vendet e BE-së tregon se kërkohen muaj e vite për një reformë solide, të konsultuar, gjithëpërfshirëse dhe funksionale.
Tabela e hartuar nga ekspertët monitorues të Institutit të Studimeve Politike (ISP) e ilustron kohën mesatare në vendet e BE për secilin nga proceset e reformës, – ndërkohë që vendimi i parlamentit tonë ofron vetëm 9 muaj për të gjitha fazat dhe për të gjithë vendimmarrjen shteruese të reformës! Kjo reformë është ndër më kryesoret në mënyrën e ndërtimit dhe funksionimit të shtetit të së drejtës dhe përfaqësimit demokratik në një vend. Rëndësia e saj e madhe dhe impakti i shumëfishtë që ka ne jetën qytetare dhe zhvillimin shoqëror do të duhej të reflektohej edhe në kalendarin e programimit, fazat e konsultimit, integritetin e procesit të reformës dhe vendimmarrjen finale.
Instituti i Studimeve Politike (ISP) po e monitoron procesin, – duke marrë tashmë të mirëqenë faktin se në aspektin formal, juridik dhe procedural praktika jonë e reformës përbën devijim serioz nga praktikat e mira të vendeve të BE-së.
