Një kuadër ligjor transparent, gjithëpërfshirës dhe bashkëkohor mbi partitë, me fokus kryesor organizimin, funksionimin dhe institucionalizimin e partive, si dhe burimet e financimit politik (elektoral dhe partiak) është kërkesë dhe nevojë në procesin e përafrimit të Shqipërisë me BE-në, forcimin e demokracisë dhe sundimit të ligjit.
Raportet periodike të OSBE/ODIHR, shoqërisë civile, GRECO, BE-së dhe KQZ-së, si dhe vlerësime periodike postzgjedhore nga aktorë politikë e publikë në vend, kanë evidentuar gjatë viteve të fundit çështje dhe problematika që kërkojnë adresim e zgjidhje. Kuvendi i RSH-së, përmes Komisionit të Posaçëm për Reformën Zgjedhore, ka rol thelbësor në jetësimin e reformës, por një konsultim i gjerë ndërpartiak dhe publik me ekspertë, shoqërinë civile, organizata partnere ndërkombëtare, median, ndihmon në identifikimin dhe adresimin më efektiv të çështjeve dhe rekomandimeve.
Bazuar në përvojën e gjatë monitoruese dhe vlerësuese mbi legjislacionin e partive politike, Instituti i Studimeve Politike (ISP) me Fondacionin Westminster për Demokraci (WFD) është angazhuar në zhvillimin e disa tryezave konsultative me partitë politike, ekspertë dhe shoqërinë civile. Tryezat kanë për qëllim identifikimin dhe adresimin e çështjeve më prioritare për ndërhyrje, duke siguruar një proces sa më gjithëpërfshirës konsultimi që vijon me rekomandime konkrete për hartimin e Ligjit për Partitë Politike/Kodit Zgjedhor. Nisma mbështetet financiarisht nga qeveria britanike përmes ambasadës së Mbretërisë së Bashkuar në Tiranë.
Tryeza e parë me pjesëmarrjen partive politike parlamentare dhe KQZ u zhvillua në Tiranë me 10.10.2025. Tryezat vijuese janë në Shkodër, Vlorë, Durrës dhe Korçë.
