“Vota nga jashtë: Parimet kushtetuese, praktikat europiane dhe sfidat në kuadër të procesit të integrimit europian” ishte tematika që mblodhi sot në një tryezë diskutimi diplomatë, deputetë, ekspertë dhe përfaqësues nga shoqëria civile për të diskutuar sfidat aktuale të votës nga jashtë, në prizmin e vendimit të Gjykatës Kushtetuese dhe procesit të bisedimeve për anëtarësim të Shqipërisë në Bashkimin Evropian.
Aktiviteti u zhvillua nga Instituti i Studimeve Politike (ISP) në kuadër të projektit “Përmirësimi i Debatit mbi Politikat dhe Llogaridhënien në përmbushje të kritereve të Grupit të Parë të Kapitujve Negociues”, mbështetur nga Ambasada e Mbretërisë së Vendeve të Ulta në Tiranë, i cili po zbatohet në bashkëpunim me disa organizata të shoqërisë civile, nën drejtimin e Qendrës për Studimin e Demokracisë dhe Qeverisjes (CSDG). Pjesë e panelit të diskutimit ishin Z. Reinout Vos, ambasador i Vendeve të Ulta në Shqipëri, i cili theksoi rëndësinë që kanë tryeza të tilla diskutimi në realizuara në kuadër të Cluster One, Z. Ilirjan Celibashi, Komisioner Shtetëror për Zgjedhjet, Znj. Jorida Tabaku, Kryetare e Këshillit Kombëtar për Integrimin Evropian, z. Lavdrim Krashi, kryetar i Nënkomisionit për diasporën dhe migracionin, deputeti z. Oerd Bylykbashi. Panelistët diskutuan mbi problematika konkrete të debatit mbi votën e diasporës dhe rolin e përgjegjësinë e institucioneve respektive për jetësimin e këtij standardi.
Dy ekspertët e ISP-së Prof. Nadia Rusi dhe Dr. Bledar Milaqi prezantuan dy punime shkencore mbi praktikat e mira aktuale në disa vende, rëndësisë së votës së diasporës në Shqipëri, ndikimet e vendimmarrjes nga Gjykata Kushtetuese si dhe krijimin e garancive ligjore mbi të drejtës e votës për emigrantët.
Materialet e plota të ekspertëve janë publikuar në faqen e ISP (www.isp.com.al).
Pjesë e diskutimit të sotëm ishin përfaqësues të Kuvendit të Shqipërisë, KSHH, ACGG, KRIIK Albania, etj.
