Një deputet në Kuvendin e Shqipërisë përfundon mandatin bazuar në nenin 71 germa ”d” të Kushtetutës së RSH. Deputeti Arben Ahmetaj (PS) e fitoi mandatin me 11,283 vota në zgjedhjet e prillit 2021 duke qenë numri 5 në listën fituese të Partisë Socialiste në qarkun Tiranë. Me 14 korrik Kuvendi miratoi me 117 vota kërkesën e SPAK për arrestimin dhe lejimit të kontrollimit të banesës së tij. Para votimit deputeti u largua nga Shqipëria dhe prej atëherë ndodhet në kërkim ndërkombëtar. Arben Ahmetaj ka qenë një prej zyrtarëve më të lartë të qeverive dhe parlamentit midis viteve 2013-2023, disa herë ministër dhe kryetar i Komisionit të Ekonomisë në parlament. Ky është rasti i parë kur një zyrtar i lartë politik dhe parlamentar është në kërkim ndërkombëtar, si dhe përfundon mandatin për shkak të arratisjes.
Instituti i Studimeve Politike (ISP) është duke monitoruar standardet e integritetit në parlament dhe partitë politike, dekriminalizimin dhe praktikat e transparencës dhe llogaridhënies në parlament. Mbi këtë bazë ISP vlerëson se trajtimi i rastit si praktikë rutinore dhe “normalitet” dëmton besimin publik tek institucionet, dobëson institucionin e parlamentit dhe i largon qytetarët nga procesi vendimmarrës.
Duke vlerësuar se liderit politikë dhe partitë politike kanë përgjegjësi për promovimin e kandidatëve dhe zyrtarëve të tyre ISP apelon që reforma në legjislacionin mbi partitë politike, mbi ligjin zgjedhor, mbi Rregulloren e Kuvendit dhe ligjin mbi statusin e deputetit të jenë pjesë prioritare e agjendës politike e parlamentare.
Shqipëria meriton politikanë dhe politikë me integritet. Kuvendi ka rol jetik në jetësimin e këtij standardi.
Instituti i Studimeve Politike (ISP)
