Instituti i Studimeve Politike (ISP), po kryen monitorimin e procesit raportues të institucioneve kushtetuese dhe atyre të pavarura të krijuara ne ligj në Kuvend, si dhe funksionin zgjedhor të Kuvendit në drejtim të këtyre institucioneve. Angazhimi është pjesë e projektit “Rritja e llogaridhënies së qeverisë përmes një Parlamenti më reagues”, i cili po realizohet nga Fondacioni Westminster për Demokracinë (WFD) me mbështetjen financiare nga Ambasada Britanike në Tiranë.
Në kuadër të monitorimit ISP ka hartuar dhe publikuar dokumentin “Vlerësimi i kapaciteteve dhe mekanizmit raportues në Kuvendin e Republikës së Shqipërisë”. Dokumenti analizon bazën ligjore, praktikat e deritanishme, gjetjet pozitive dhe problematikat, përvojat rajonale dhe ndërkombëtare, si dhe ofron rekomandime konkrete përmirësuese për Kuvendin dhe institucionet raportuese. Dokumenti është në dy formate, përmbledhje me gjetjet dhe rekomandime, si dhe një raport shumë më i detajuar me të gjithë elementët e vlerësimit.
Përmbledhjet e dy dokumenteve janë pjesë e kontributit të ISP dhe WFD për forcimin e standardeve të transparencës dhe llogaridhënies së institucioneve të pavarura dhe kushtetuese që raportojnë në Kuvend, si dhe të inkurajimit për rritjen e rolit të institucioneve publike dhe shoqërisë civile në adresimin e rekomandimeve përmes “Platformës Ndër-institucionale” të Kuvendit.
Qëllimi i aktivitetit është të sjellë në tryezë përfaqësues nga Kuvendi, institucionet që kryejnë raportime vjetore në Kuvend, ekspertë të fushës, si dhe përfaqësues nga shoqëria civile dhe media.
Një përmbledhje e aktivitetit gjendet në videon e mëposhtme:
