Instituti i Studimeve Politike (ISP) ka kritikuar incidentet e panevojshme dhe gjuhën denigruese që përdoret në mbledhjet e komisioneve. Sipas ISP deputetët e Kuvendit të Shqipërisë përfaqësojnë popullin dhe nuk lidhen me asnjë mandat detyrues.
ISP iu bën thirrje partive politike parlamentare që të hartojnë dhe publikojnë Rregulloret e Brendshme të funksionimit të grupeve parlamentare dhe mbi bazën e tyre dhe të Kodit të Sjelljes, të distancohen nga praktikat negative dhe rastet e devijimit nga kodet etike.
Deklarata e ISP-së:
Incidente, headline negative dhe akte jo etike në Kuvend? Koha që grupet parlamentare të moderojnë sjelljen dhe të reagojnë: distancim nga aktet jo etike dhe rikthim të normalitetit parlamentar dhe në axhendën me interes publik!
Instituti i Studimeve Politike (ISP) shpreh keqardhjen që legjislatura e re parlamentare po shoqërohet me incidente të panevojshme në zhvillimin e mbledhjeve në komisione, me bojkotime të pjesshme dhe gjuhë denigruese komunikimi, me shkelje të etikës në komunikim dhe në sjelljen publike, me interpretim politik të akteve rregullatore të Kuvendit dhe mbivendosje të interesave afatshkurtra politike mbi interesin publik dhe institucional.
Kuvendi i RSH është institucioni kryesor përfaqësues dhe vendimmarrës në sistemin tonë politik. Deputetët janë zgjedhur nga listat shumëemërore të partive, por ata janë ushtrues të sovranitetit qytetar dhe sipas nenit 90 të Kushtetutës ata “përfaqësojnë popullin dhe nuk lidhen me asnjë mandat detyrues”. Nga kjo pozitë kushtetuese qytetarët presin që deputetët të dëshmojnë akte përgjegjësie dhe përgjegjshmërie në ushtrimin e funksionit të tyre.
ISP apelon partitë politike parlamentare të hartojnë dhe publikojnë Rregulloret e Brendshme të funksionimit të grupeve parlamentare, dhe mbi bazën e tyre dhe të Kodit të Sjelljes, të distancohen nga praktikat negative dhe rastet e devijimit nga kodet etike. ISP apelon veçanërisht kryetarët e komisioneve të përhershme dhe të përkohshme në parlament, të demonstrojnë moderacion, neutralitet organizativ, sens përgjegjësie në planifikim dhe drejtim, transparencë dhe profesionalizëm në nxitjen e kulturës së debatit parlamentar dhe në aplikimin e standardeve më të larta të komunikimit dhe të vendimmarrjes.
Deklarata e plotë e Institutit të Studimeve Politike (ISP)
https://newsbomb.al/gjuha-denigruese-isp-thirrje-partive-politike-distancohuni-nga-shkeljet-e-etikes-deputetet-perfaqesojne-popullin/?
