Janë zgjedhur të na përfaqësojnë. Marrin vendime për ne, për hapësirën publike, për taksat dhe për projektet e ardhshme. Kur u zgjodhën më 2015 premtuan shumë, por mbi të gjitha, premtuan një qeverisje për qytetarët dhe me qytetarët. Instituti i Studimeve Politike (ISP) me mbështetjen e Lëviz Albania (LA) është duke realizuar projektin “Bashkitë e qarkut Tiranë: transparenca, qeverisja qytetare dhe llogaridhënia”. Stacioni i radhës sot ishte Universiteti Mesdhetar i Shqiperise (UMSH), studentët e fakultetit juridik.
Ekspertët e ISP prezantuan gjetje nga bilanci i monitorimit të këshillave bashkiakë dhe bashkisë në qarkun Tiranë (pesë bashkitë, Tiranë, Kamëz, Vorë, Kavajë dhe Rrogozhinë). Të dhënat e monitorimit tregojnë se vetëm një pjesë e këshilltarëve janë aktivë dhe në raport me qytetarët, përqindja e pjesëmarrjes së qytetarëve në vendimmarrje vijon të jetë minimale, pushteti vendosur është përballur me sfida të mëdha në ofrimin e shërbimeve dhe se sistemi i ri i qeverisjes vendore vijon të jetë ende në fazë eksperimentale në shumë elementë të kompetencave të tij.
Studentët janë vetë banorë të bashkive në qark, taksapagues dhe përfitues të shërbimeve të tij. Ata debatuan mbi elementë të ndryshëm të bilancit në përfaqësimin politik, në problematikat e transparencës dhe të llogaridhënies publike, si dhe sugjeruan masa e ndërhyrje të mundshme për përmirësimin e qeverisjes dhe për një pushtet vendor në shërbim të qytetarëve dhe me qytetarët.
Pas takimeve të njëjta të ISP në Tiranë, Kamëz, Vorë, Kavajë, Rrogozhinë dhe disa universitete të tjera, takimi si ky në UMSH do të vijojnë edhe në dy universitete të tjera në Tiranë.
