Reforma në drejtësi ka hyrë në fazën e jetësimit të institucioneve të sistemit të ri. Midis pritshmërive të mëdha publike dhe rezultateve të deritanishme ka ende një hendek të madh, por në çdo rast reforma mbetet një zhvillim pozitiv dhe një nevojë e madhe për forcimin e shtetit të së drejtës dhe të demokracisë funksionale në Shqipëri.
Institucionet e reja kanë përgjegjësi dhe kompetenca që duhet të njihen për të kuptuar më mirë bilancin e punës së tyre. Vettingu i deritanishëm është vetëm një fazë e reformës, pjesa më e vështirë sapo ka nisur dhe rruga mbetet e gjatë. Për këto e tema të tjera Instituti i Studimeve Politike bashkëbisedoi me studentë të departamentit të drejtësisë në fakultetin e drejtësisë dhe të shkencave sociale, në Universitetin EPOKA.
Referues në takim ishin ekspertët e njohur, Prof. Dr. Ervin Karamuço nga Instituti i Studimeve Politike, si dhe Assoc. Prof. Dr. Lisen Bashkurti, Dekan i Fakultetit të Drejtësisë dhe Shkencave Sociale. Prezantimet e panelistëve u përqendruan në ecurinë e deritanishme të reformës në drejtësi në vendin tonë, me një fokus të veçantë në problematikat dhe sfidat me të cilat ky proces vijon të përballet.
Aktiviteti ishte në kuadër të projektit “Reforma në drejtësi: me qytetarët dhe për qytetarët. Nga ligjet tek jetësimi praktik. Informim, lobim dhe monitorim” mbështetur nga programi i ligjit, OSFA.
