Parimet e integritetit në politikë dhe në vendimmarrje, nuk janë një kusht apriori i imponuar nga jashtë, por një interes jetik për shtetin dhe shoqërinë shqiptare. Qytetarët kanë nevojë të shohin vendimmarrës të pastër, transparentë dhe llogaridhënës. Reforma në drejtësi mundësoi modelin e parë të vettingut, dekriminalizimi nisi vetingun në politikë, integriteti paraqet një sfidë shumë më komplekse dhe më të gjerë.
Baza kushtetuese dhe politike, raportet me liritë qytetare dhe interesin publik, përvojat shqiptare, rajonale dhe ndërkombëtare, bilanci i dekriminalizimit dhe koncepti i integritetit në përfaqësim, roli i shoqërisë civile, qytetarëve dhe botës akademike, si dhe mekanizmat më efektivë drejt një demokracie më funksionale e shteti të së drejtës ishin pjesë e diskutimit në aktivitetin e Institutit të Studimeve Politike (ISP) me studentë të drejtësisë në Fakultetin e Shkencave Humane dhe të Drejtësisë të Universitetit “Ismail Qemali” Vlorë.
Ekspertët e ligjit dhe zgjedhjeve, eksperti i ISP Prof. Ervin Karamuço, drejtuesi i departamentit Dr. Erjon Hitaj dhe znj. Alketa Dhimitri drejtuese e Vlora Youth Center, bashkëbiseduan me studentët në aktivitetin me temë “Fuqizimi i integritetit të zgjedhjeve në Shqipëri”. Studentët pjesëmarrës treguan interes mbi tematikën dhe u bënë pjesë aktive e debatit mbi aspekte të ndryshme nga këndvështrimi ligjor dhe impaktin në jetën publike, si dhe sollën eksperienca e këndvështrime plotësuese. Ky është aktiviteti i tretë i ISP me të njëjtën tematikë në nivel universitar, pas Tiranës dhe Durrësit.
Ky aktivitet u organizua në kuadër të projektit “Fuqizimi i integritetit të zgjedhjeve dhe i qëndrueshmërisë së partive politike”, zbatuar nga Institutin e Studimeve Politike (ISP), si pjesë e konsorciumit me Komiteti Shqiptar i Helsinkit (KSHH) në partneritet me BIRN Albania dhe Qëndresa Qytetare (QQ), mbështetur financiarisht nga British Embassy Tirana
