Instituti i Studimeve Politike dhe Fakulteti i Drejtësisë në Universitetin e Tiranës vijuan bashkëbisedimin me studentët e këtij fakulteti lidhur me procesin e rregullt ligjor, me lektor Prof. Sokol Mëngjesi. Aktiviteti bëhet në kuadër të programit të Këshillit të Europës për thellimin e njohurive të studentëve të Fakultetit të drejtësisë me vendimet dhe jurisprudencën e Gjykatës Europiane për të Drejtat e Njeriut, veçanërisht lidhur me problematikën e pronësisë, procedurat penale dhe praktikat gjyqësore.
Studentët janë të ftuar të marrin pjesë në takime të veçanta me ekspertë të fushës dhe të debatojnë me ta, të testojnë njohuritë dhe ekspertizën e tyre dhe kështu, të krijojnë një panoramë të plotë të problematikës. Zhvillimi i kurseve merr në konsideratë edhe synimin që çështje të tilla me rëndësi për shtetin e së drejtës dhe të demokracisë të jenë pjesë integrale e proceseve të ardhshme mësimore për studentët e fakulteteve juridike në Shqipëri.
