Detyrimi ligjor: Kodi Zgjedhor, neni 92/4 përcakton kompetencën e KQZ për caktimin e personale për të monitoruar përmbushjen nga subjektet zgjedhore të detyrimeve në lidhje me fushatën elektorale, sipas përcaktimeve të udhëzuesit nr. 1, 2 shkurt 2020. Sipas nenit 5 të udhëzuesit, monitoruesi duhet të depozitojë në format elektronik si dhe fizikisht raportet e ndërmjetme te Komisioneri Shtetëror i Zgjedhjeve çdo 10 ditë nga fillimi i periudhës së monitorimit deri në ditën e zgjedhjeve.
Problemi? KQZ nuk arriti të bëjë emërimin e monitoruesve në afatin kohor të përcaktuar nga Kodi Zgjedhor, por për më tepër, raportet e monitorimit të publikuara në faqen zyrtare të KQZ kanë të dhënë kontradiktore, monitorime mbi subjekte që nuk janë pjesë e procesit zgjedhor apo vlerësime të kundërta për të njëjtat pyetje / metodologji.
Zgjidhja? KQZ duhet të kishte realizuar trajnim më profesional të monitoruesve dhe të bëjë verifikimin e të dhënave të tyre, për të siguruar të njëjtin standard raportimi dhe metodologjie. Raportet monitoruese janë dokumente zyrtare dhe duhet të hartohen me etikën dhe normat zyrtare, sipas ligjit.
Instituti i Studimeve Politike (ISP) është duke monitoruar KQZ dhe fushatën elektorale, si pjesë të angazhimit në projektin “Monitoring the 2021 Parliamentary Elections in Albania” mbështetur financiarisht nga qeveria e Mbretërisë së Bashkuar përmes ambasadës britanike në Tiranë.
