Qytetarët e qarkut Tiranë deklarojnë se nuk i njohin shumicën e këshilltarëve lokalë dhe se nuk kanë marrë ftesa e njoftime për takime konsultimi me bashkinë, lidhur me vendimmarrjet më të rëndësishme për komunitetin e tyre. Qytetarët e pesë bashkive të qarkut Tiranë presin që qeverisja vendore të jetë më transparente, më përfshirëse, më përfaqësuese dhe më lokale sesa modeli i tranzicionit nga reforma e re administrative tek jetësimi i saj problematik në terren.
Këshilli bashkiak, këshilltarët, bashkia dhe organet e tjera përfaqësuese kanë rol thelbësor në përfaqësimin qytetar. Sa e bëjnë ato këtë gjë? A janë përfaqësuese dhe transparente? Këto e çështje të tjera u diskutuan sot midis stafit të Institutit të Studimeve Politike dhe studentëve të fakultetit juridik në Kolegjin Universitar “Luarasi”. Faleminderit Prof. Rezana Konomi për mbështetjen.Takimi bëhet në kuadër të projektit “Bashkitë e qarkut Tiranë: transparenca, qeverisja qytetare dhe llogaridhënia” që ISP po zbaton me mbështetjen e Lëviz Albania (LA).
Pas takimeve të njëjta të ISP në Tiranë, Kamëz, Vorë, Kavajë, Rrogozhinë dhe disa universitete të tjera, takimi si ky në Kolegjin Universitar “Luarasi” do të vijojnë edhe në dy universitete të tjera në Tiranë.
