23 ditë përpara ditës së zgjedhjeve ende partitë politike nuk kanë prezantuar një program elektoral. Standardi i programit elektoral është kërkesë ligjore, është praktikë demokratike, është instrument thelbësor i politikës si veprimtari publike, si dhe tregues i respektit për zgjedhësit dhe institucionet. Instituti i Studimeve Politike (ISP) shpreh shqetësimin se zgjedhjet e 25 prillit, edhe për këtë arsye, po rrezikojnë të humbin shansin të jenë ofrojnë zgjidhje për qytetarët dhe vendin.
Në mungesë të programit dhe debatit për programet dhe diferencat në alternativa, ligjërimi politik është adresuar në mënyrë e drejtim të gabuar. Retorika personale dhe denigruese, indimidimi dhe përpjekja për ta kthyer fushatën në show pa përmbajtje dhe pa kontratë besimi me qytetarët përbën një zhvillim negativ për integritetin e procesit zgjedhor dhe konceptin e institucionit të zgjedhjeve.
Shqipëria e vitit 2021 nuk mund të jetë më vendi ku politikanët shpërfillin pa respekt minimal institucionet, parimet demokratike dhe qytetarët. Shqipëria e vitit 2021 nuk mund të jetë vendi unik, ku politika imponon që në mediat kryesore të trajtohen si lajme kryesor dhe live akte rutinë dhe pa asnjë vlerë në konceptin e mirëqeverisjes dhe demokracisë funksionale, si mbjellja e një peme, kafe e politikanit me një person, ecja e politikanit në rrugë, shëtitja e politikanit me biçikletë, vajtja e politikanit live me ekip regjistrimi tek qytetarët që bëjnë vaksinën, biseda e në rrugë e politikanit me ndonjë vartës të tij, vajtja e politikanit tek berberi i tij apo xhiro e politikanit me fëmijët e tij, etj.
Qytetarët dhe vendi përballen me sfida serioze dhe të shumta, ndaj kërkojnë nga politikanët, por edhe nga media, sjellje serioze dhe me integritet. ISP apelon politikanët të kthehen tek politika dhe standardet e saj për konkurrencën dhe vlerat, të kthehen tek zgjedhjet dhe pritshmëritë e mëdha për meritokraci, aftësi, vizion e alternativa. ISP apelon edhe median që në çdo raportim mbi zgjedhjet të kenë parakusht ofrimin nga partitë dhe kandidatët të programit elektoral, të refuzojnë lajmet e gatshme si dhe midis shërbimit politik dhe shërbimit publik, të zgjedhin këtë të fundit.
