Bashkia Kamëz është një prej bashkive me rritjen më të madhe në numër banorësh në 20 vitet e fundit në Shqipëri. Zgjerimi i saj reflektohet edhe në zhvillimin social, infrastrukturë dhe problematika. Sfida e mirëqeverisjes nuk kërkon vetëm ushtrim legjitim të pushtetit, por edhe përfshirje të qytetarëve në konsultim, vendimmarrje dhe llogaridhënie. Këshilli bashkiak Kamëz ka rreth 11 subjekte elektorale të përfaqësuara me mandate, – shumë më tepër parti sesa në përfaqësimin në bashkinë Tiranë.
Roli i këshillit, ecuria e reformës së re administrative, raportet e këshillit me qytetarët zgjedhës, respektimi i standardeve të transparencës dhe llogaridhënies, ushtrimi i qeverisjes përmes pjesëmarrjes qytetare, aksesi për informacion për qytetarët e interesuar dhe problematikat specifike që lidhen me elementët e tjerë të aktivitetit në këtë bashki, ishin pjesë e debatit të zhvilluar nga ekipi i Institutit të Studimeve Politike në bashkinë Kamzës.
Pjesë e debatit, – këshilltarë në Këshillin Bashkiak, drejtues të bashkisë, përfaqësues nga njësitë administrative, përfaqësues nga shoqëria civile në Kamzës dhe nga grupe të ndryshme të interesit. Vlerësime, debate, kritika, sugjerime, – pjesë e tryezës së ISP, në moderimin e ekspertit të njohur të komunikimit Lutfi Dervishi, një prej themeluesve të ISP.
Aktiviteti në Kamëz është pjesë e projektit “Bashkitë e qarkut Tiranë: transparenca, qeverisja qytetare dhe llogaridhënia”, që Instituti i Studimeve Politike po realizon me mbështetjen e Lëviz Albania në të gjitha bashkitë e qarkut Tiranë. Paralelisht ISP ka zhvilluar anketime të këshilltarëve dhe sondazh me qytetarët për secilën bashki, për të ndërthurur gjetjet drejt një analize cilësore dhe ofrimit të rekomandimeve për përmirësimin e treguesve të transparencës, pjesëmarrjes e llogaridhënies.
Faleminderit këshilltarëve, pjesëmarrësve nga njësitë, bashkia, komuniteti lokal dhe OJF-të, si dhe eksperteve tanë, Lutfi Dervishi dhe Alban Hoxha.
