Instituti i Studimeve Politike (ISP) realizoi me eksperten e njohur Prof. Eralda Methasani trajnimin e parë me stafin monitorues të Kuvendit mbi konfliktin e interesit dhe standardet e larta anti-korrupsion në vendimmarrjet dhe aktivitetin parlamentar në Shqipëri.
Trajnimi është pjesë e projektit “PARLAMENT I PASTËR: LLOGARIDHËNIE DHE TRANSPARENCË”, të cilin ISP po e zbaton me mbështetjen e programit të shoqërisë civile për Shqipërinë dhe Kosovën financuar nga Ministria e Jashtme e Norvegjisë dhe të menaxhuar nga Partnerët Shqipëri për Ndryshim dhe Zhvillim në vendin tonë.
Nisma e ISP-së synon të bëjë monitorimin e gjithanshëm të detyrimeve që burojnë nga Kodi i Sjelljes lidhur me konfliktin e interesit në aktivitetin parlamentar, – monitorimin për secilin deputet, për secilin grup parlamentar, për përgjegjësitë e Kuvendit, për rolin dhe përgjegjësitë e ILDKP dhe institucioneve të tjera të përfshira direkt ose indirekt; ndjekjen e problematikave dhe raportimeve mediatike mbi këtë problematikë, si dhe sensibilizimin e Kuvendit dhe të partive politike mbi standardet e aplikimit të parandalimit të konfliktit të interesit në vendimmarrjen parlamentare.
