Në prag të zgjedhjeve parlamentare partitë politike janë aktive në komunikimet publike me qytetarët, median dhe mbështetësit, duke e fokusuar ligjërimin tek objektivat e veta elektoralë. Klima e tensionuar politike përbën një pengesë të përhershme për qasje konstruktive elektorale, ndërsa nevojat elektorale kanë kushtëzuar natyrën e ligjërimit politik.
Instituti i Studimeve Politike (ISP) po monitoron standardet e integritetit te partitë politike, procesi zgjedhor dhe tek institucionet me natyrë politike.
Elemente pozitive lidhur me ligjërimin politik për zgjedhjet
- Partitë tradicionale dhe të reja janë aktive në deklarata/qëndrime;
- Partitë i adresojnë akuzat e tyre në SPAK dhe organet ligjzbatuese;
- Partitë kanë aktivizuar faqe online duke dokumentuar aktet e tyre;
- Vendin e gazetave partiake e kanë zënë mediat e reja sociale;
- Partitë po zhvillojnë konferenca shtypi dhe nuk bojkotojnë median;
- Politikanët që kanë ide e vizion kanë akses në media e publik;
- Partitë kanë zëvendësuar mitingjet me takimet e vogla komunitare;
- Verifikimi i fakteve/deklarimeve monitorohet nga disa media serioze;
- Liria e medias është bërë pjesë e premtimeve/retorikës politike.
Elementë shqetësues lidhur me ligjërimin politik për zgjedhjet:
- Ligjërimi partiak/politik dominohet nga personalizimi dhe denigrimi;
- Partitë nuk kanë ende programe, ligjërimi si devijim nga përgjegjësia;
- Ligjërimi i partive nuk dallon nga propaganda elektorale e tyre;
- Përfaqësuesit politikë dominojnë show-të e debateve televizive;
- Ligjërimi në parlament dhe qeveri si pjesë e fushatës elektorale;
- Qëndrimet moderatore/kritike atakohen nga militantët e partive;
- Partitë kanë krijuar “ushtri online” për ndikim në mediat sociale;
- Ligjërimi partiak riprodhon tezat e kryetarëve, vuan nga uniformiteti;
- Shumica e mediave/gazetarëve shfaqin preferenca të dukshme partiake.
Ky factsheet është realizuar në kuadër të projektit “Fuqizimi i integritetit të zgjedhjeve dhe i qëndrueshmërisë së partive politike”, loti “Forcimi i rolit monitorues dhe kërkesës së llogarisë nga qytetarët nëpërmjet shoqërisë civile, medias dhe mbështetjes akademike”, zbatuar nga Komiteti i Helsinkit (KSHH) në partneritet me Institutin e Studimeve Politike (ISP), BIRN Albania dhe Qëndresa Qytetare (QQ), mbështetur financiarisht nga Ambasada Britanike.
