Në datat 12 dhe 13 shtator në Kuvendin e Republikës së Maqedonisë së Veriut u zhvillua aktiviteti i parë rajonal në kuadër të projektit “Diplomacia Parlamentare: Bashkëpunimi Rajonal Përmes Dialogut të Përforcuar Parlamentar”. Aktiviteti 2-ditor pati për qëllim afrimin e Procesit të Berlinit me Deputetët dhe ekspertët e Kuvendit nga 6 vendet e Ballkanit Perëndimor, si dhe inicimin e një debati dhe bashkëpunimi ndërparlamentar me stafet parlamentare mbi rolin e parlamenteve të vendeve të BP në kuadër të procesit të Berlinit.
Konferenca u përshëndet nga Kryetari i Kuvendit të Republikës së Maqedonisë së Veriut Z. Talat Xhaferri, Kryetari i Komisionit për Politikën e Jashtme i Bundestagut Gjerman, z. Michael Roth, ambasadorja e Republikës Federale të Gjermanisë, znj. Petra Drexler dhe drejtuesi i Institutit për Demokraci, Marko Troshanovski i cili i uroi mirëseardhjen të pranishmëve dhe falenderoi Republikën Federale Gjermane për interesin dhe mbështetjen e saj në përparimin e perspektivës europiane të rajonit përmes promovimit të kësaj nisme. Gjatë kësaj Konference u theksua rëndësia e pjesëmarrjes aktive të parlamenteve në Procesin e Berlinit, nëpërmjet krijimit të dialogut parlamentar në fushat kyçe të bashkëpunimit politik, ekonomik, social dhe të sigurisë në rajon.
ISP falenderon për bashkëpunimin Kuvendin e Republikës së Shqipërisë, Kryetaren e Komisionit për Çështjet Europiane znj. Jorida Tabaku e cila theksoi rëndësinë e zbatimit të marrëveshjeve të lidhura në kuadër të procesit të Berlinit dhe nevojën e domosdoshme të informimit të Parlamentit mbi çdo akt të ndërrmarrë nga qeveria shqiptare në procesin e integrimit të Shqipërisë në Bashkimin Europian dhe në veçanti të Procesit të Berlinit, duke e konsideruar atë si detyrim ligjor për informimin e qytetarëve, bazuar dhe në ndryshimet e fundit të ligjit nr. 15/2015 “Për rolin e Kuvendit në procesin e integrimit të Republikës së Shqipërisë në Bashkimin Europian”, deputetët pjesëmarrës z. Kreshnik Çollaku, znj. Sorina Kote, z. Xhelal Mziu dhe z. Petrit Doda si dhe stafin përfaqësues të komisioneve parlamentare.
Aktiviteti është pararendës i takimit të radhës i cili do të mbahet në Tiranë, më datë 13 tetor 2023, në bashkëpunim me Kuvendin e Shqipërisë, pjesë e projektit " Diplomacia Parlamentare: Bashkëpunimi Rajonal Përmes Dialogut të Përforcuar Parlamentar ", i cili synon të promovojë marrëveshjet dhe përfitimet e Procesit të Berlinit përmes promovimit të diplomacisë parlamentare dhe përdorimit të mekanizmave mbikëqyrës nga parlamentet e Ballkanit Perëndimor.
Projekti zbatohet nga gjashtë organizata partnere në vendet e Ballkanit Perëndimor, IDSCS Institut alternativa, CRTA, Kosova Democratic Institute / Transparency International Kosova, Mreža progresivnih inicijativa, Instituti i Studimeve Politike / Institute for Political Studies. Projekti mbështetet nga Ministria e Punëve të Jashtme Gjermane.
