Gjetjet e monitorimit të Institutit të Studimeve Politike tregojnë se zhvillimet në reformë kanë ndikuar edhe në ligjërimin politik e publik ndaj saj. Nga debatet mbi mënyrën sesi do të bëhej reforma është kaluar në debatet mbi mënyrën sesi po punojnë institucionet e reja dhe po jetësohet reforma. Ngritja e Këshillit të Lartë Gjyqësor, Këshillit të Lartë të Prokurorisë, Këshillit të Emërimeve në Drejtësi ka bërë që ligjërimi të zhvendoset nga vettingu i gjyqtarëve dhe prokurorëve tek prurjet dhe standardet e reja në sistemin e drejtësisë.
Cilësia e ligjërimit të institucioneve, të shoqërisë civile, të ekspertëve dhe të medias ndaj reformës është më profesionale, më e paanshme dhe më mbështetëse ndaj thelbit të reformës krahasuar me vitin 2018.
Hendeku real midis perceptimit të partive dhe qytetarëve ndaj reformës, është tregues kritik dhe një risk ndaj integritetit dhe rezultateve të pritshme të reformës në drejtësi. Aktorët kryesorë politikë vijojnë ta trajtojnë reformën në drejtësi si mjet të luftës politike, duke u shfaqur në kontrast të thellë, – nga parti politike që mbështesin reformën për të përfituar nga suksesi i saj apo për të denigruar palën tjetër tek parti politike që e kontestojnë apriori reformën për të minimizuar impaktin e saj dhe delegjitimuar palën tjetër politike.
